Məlum videoda 2 nüans maraqlıdır - Alimdən diqqətçəkən açıqlama

"Heç kim uşaqların və gənclərin necə stres altında olduqlarını təsəvvür etmir". 

Ölkə.Az xəbər verir ki, bunu fizik, ADA Universitetinin müəllimi Yalçın İslamzadə deyib. Onun fikrincə, böyüklərin yaratdıqları problemlərin əvəzini uşaqlar ödəyir:

"Oyun sahələri əllərindən alınıb, bina-obyekt tikilib. Ana dilində inkişaflarına kömək və dəstək olacaq proqramlar yoxdur, efir əllərindən alınıb, sırtıq ara müğənniləri efiri işğal edib.

Evdə böyüklərinə sitayiş etmələri, məktəbdə müəllimə itaət etmələri gözlənilir. 
Valideyin məktəbin üstünə, ("məktəbdə sizə tərbiyə vermirlər?"), məktəb də valideyinin üstünə atır ("evdə sizə tərbiyə vermirlər?").

Köhnə ədəbiyyat dərsliklərindəki oxu materiallarına baxanda bir "ideoloji xətt" görünür: materiallarda müdrik nənələr və babalar yaramaz uşaqları danlayırdılar: "tərbiyəli, hörmətli olun" -  əsas mesaj bu idi.

Uşaqları idmana və repetitora göndərməklə iş bitmir. Bunlar yalnız karyera üçündür, psixoloji komponenti yoxdur. Valideyin də biraz müəllim, müəllim də biraz valideyin olmalıdır.
İndi ailə və məktəb müəssisəsi üz-üzədir, "Kimdir günahkar" sualında günahı qarşı tərəfin üstünə atır". 

Y.İslamzadə deyib ki, məlum videoda iki nüans maraqlıdır:

"Şagirdin biri bekarçılıqdan həmyaşıdını şeytanın belə ağlına gəlməyəcək formada alçaltmağa çalışır. Digəri isə özünü müdafiə edə bilmir.
Biri quldur kimi, biri müti yetişdirilib. Ümumi tendensiyadır - birinə deyirlər "başını aşağı sal", o birinə deyirlər "nə edirsən yaxşı edirsən".

Bir şagird həmyaşıdını təhqir etmək üçün ifrat tərbiyəsiz böyüklərin edəcəyi hərəkətləri edir. Artıq uşaqlarla, gənclərlə böyüklərin dünyası arasında pərdə qalmayıb. 

Böyüklərin mənasız məzmunsuz dünyası birbaşa şagirdlərə çatır, arada heç bir keçid, filtrasiya yoxdur. Bu gün gənc və yeniyetmələrə sosial şəbəkələr vasitəsiylə çatan rol modelləri, həyat və təfəkkür tərzi heç də təqdir olunacaq, mənəvi-tərbiyəvi yönü olan həyat tərzi deyil".

Billurə