Salam verən kimi dilənçilik edirlər

Sosial şəbəkələrin məqsədi hər nə qədər sosiallaşma, yeni insanlarla ünsiyyət, gündəlik həyatla bağlı müxtəlif anların paylaşılması olsa da, buradan başqa niyyətlərlə istifadə edənlər də az deyil.

Təəssüf ki, son dövrlər sosial şəbəkələr sosiallaşmaqdan daha çox kimlərəsə qazanc gətirməyə xidmət edir.

Belə ki, müxtəlif adda olan bu platformalardan reklam, məhsul satışı, hətta dələduzluq üçün istifadə edənlərlə yanaşı, mədəni dilənçiliklə məşğul olanlar da az deyil.

Sosial şəbəkə istifadəçilər bildirirlər ki, burada yeni dostlaşmış yad adamların bəziləri “dost”undan dərhal yazıb pul istəyir. Bu məsələ zaman-zaman gündəmə gəlsə də, son dövrlərdə yenidən aktuallaşıb.

Bu cür vəziyyətdən gileylənənlərdən biri də “Bakı vaxtı” saytının baş redaktoru Qalib İbrahimoğludur. Belə istəklərdən narahat olan tanınmış jurnalist feysbuk dostlarına müraciət də ünvanlayıb.

“Mesencerdə “Salam” yazıb “Əleyküm” alandan sonra “qardaş”ım olub da, özünü çox yaxın hiss edən feysbukdakı bəzi dostlarım, mən nə nazirəm, nə nazir müavini. Heç komitə sədri, yaxud komitə sədrinin müavini də deyiləm. Mənim biznesim yoxdur və bundan sonra da olacağına inanmıram.
Mən sadəcə jurnalistəm. Bəli, bu gün baş redaktoram, Amma heç kəsin xətrinə dəyməsin, kənardan “paket” alan, 5-6 yerdən dolanan baş redaktorlardan deyiləm. Odur ki, acizanə xahişim: maddi yardım üçün mənə üz tutmayın”.

Azərbaycan Milli Elmlər Akademiyasının (AMEA) Folklor İnstitutunun aparıcı elmi işçisi Elyar İslamoğlu da realda üzünü belə görmədiyi insanların ondan pul istəməsindən narazılığını ifadə edib:

“Real həyatda bir dəfə də üz-üzə oturmadığımız, görüşmədiyimiz, bir stəkan çay içmədiyimiz adamlar rahatlıqla yazıb borca pul istəyir. Deyirsən yoxdur. Dərhal yazır ki, dost-tanışdan, qohumlardan alıb ver də. Sırtıqlığın dərəcəsinə bax da.
Gün ərzində üç-dörd belə mesaj yazırlar. Hamısı da 30 manat istəyir. Deyəsən 30 fırıldaqçıların ortaq rəqəmidir”.

Sosial şəbəkə istifadəçiləri isə hesab edir ki, bu, fırıldaqçıların yeni üsuludur. Qeyd edilir ki, az məbləğ istəməkdə məqsəd odur ki, verən adam çox düşünməsin və istəyəndə də məbləğ böyük olmadığı üçün soruşmağa çəkinsin.

Hətta bu cür şəxslərin eyni anda pul üçün birdən çox adama üz tutduğu bildirilir.

Billurə Yunus