Azərbaycan ABŞ-yə yumurta satışına başladı: Qiymətlər artacaq? - AÇIQLAMA
Ölkə.Az xəbər verir ki, Azərbaycan Quş Əti, Yumurta İstehsalçıları və İxracatçıları Assosiasiyası məlumat yayıb.
Qeyd edilib ki, ötən ildən ABŞ-da quş qripinin yayılması ilə əlaqədar yumurta qıtlığı və qiymətlərin bahalaşması müşahidə olunmaqdadır. ABŞ hökuməti bu prosesin qarşısını almaq üçün xarici ölkələrdən yumurta idxalına icazə verib.
Azərbaycanın ən böyük quşçuluq təsərrüfatlarından biri ABŞ standartlarına uyğun sertifikatlaşdırmadan uğurla keçərək bu ölkəyə süfrə yumurtası ixracı icazəsi əldə edib. Bu aydan etibarən şirkət ABŞ-a müntəzəm yumurta ixracına başlayır.
O da vurğulanıb ki, ABŞ-yə ixracın başlanması Azərbaycan daxilində yumurta təchizatı və qiymətlərə hər hansı təsir etməyəcək.
Məlumata görə, hazırda Azərbaycanda süfrə yumurtasına olan gündəlik tələbat 4 milyona yaxındır. Faktiki istehsal isə 6 milyon civarındadır. Bu istehsalın az bir qismi xaricə ixrac olunsa da, daxili tələbatı artıqlaması ilə ödəyəcək sayda ölkədə qalır. Hazırda anbarlarda 100 milyon ədədə qədər yumurta var.
Qeyd edək ki, ABŞ-də quş qipinin yayılması və bəzi marketlərin yumurta alışını məhdudlaşdırmasına görə, qiymətlər dekabrdan yanvaradək 15% artaraq son 10 ilin ən böyük qiymət artımına səbəb olub.
ABŞ yumurtaya olan tələbatı qarşılamaq üçün bu yaxınlarda Türkiyədən də yumurta idxalına başladığınl açıqlayıb.
Billurə
