Azərbaycanda məscidlərin və məktəblərin sayı – Şərurlu İsfəndiyar nə qədər səmimidir?

Ölkə.Az xəbər verir ki, o, imkanı olsa, məscidləri söküb yerində məktəb tikmək istəyindən danışıb:

“Allaha inanıram, lakin qorxmuram. Qorxum vicdanımdandır. Dindən qorxuram. Mənim əlimdə imkanım olsa, bütün məscidləri söküb yerində məktəb tikdirərəm. Dindarlara inanmıram. Mənə ən böyük zərbələri onlar vurub. İş verirəm, məni aldadırlar. Bütün müqavilələri Allahın adı ilə başlayırlar, sonra da aldadırlar. Dindarların sayının artması ən böyük təhlükədir. Ondan dövlətə qarşı istifadə edirlər”.

Onun bu açıqlamasından sonra ölkəmizdə məktəb və məscid nisbətinin nə qədər olması sualı meydana çıxır.

2024-cü il açıqlanan sonuncu statistikaya görə, ölkəmizdə 4 329 məktəb fəaliyyət göstərir və bu təhsil ocaqlarında 1.7 milyon şagird təhsil alır.

Yenə ötən ildə açıqlanan başqa bir statistikaya görə, respublika ərazisində 2253 məscid mövcuddur.

2022-ci ilə aid digər bir məlumatda isə son 15 il ərzində respublika ərazisində 3100-dən çox məktəbin tikilməsi və təmir edilməsi barədə məlumatlar yer alır.

2023-cü ildə yayımlanan məlumatlarda da qeyd edilir ki, son 20 ildə Azərbaycanda 435 məscid tikilib.

Belə ki, Azərbaycan müstəlliyini bərpa edən zaman cəmi 17 məscid fəaliyyət göstərirdisə, bu məscidlərin sayı hazırda 2253-dür. Bu da o deməkdir ki, müstəqillikdən bəri (son 34 ildə) ölkəmizdə ümumilikdə 2236 məscid tikilib.

Uzun sözün qısası, hörmətli iş adamımız bilməlidir ki, ölkəmizdə son 15-20 ildə tikilən məktəblərin sayı məscidlərdən çoxdur və məktəb tikintisi prioritet olaraq qalır.

Hətta azad olunan ərazilərdə də həm məscidlər, həm də məktəblər inşa olunur.

Bu tikintilər zamanı təbii ki, yaşayış yerinə uyğun olaraq əhalinin tələbatı nəzərə alınır.

Və ümumiyyətlə Şərurlu İsfəndiyar bilməlidir ki, məktəb tikmək üçün məscid sökməyə ehtiyac yoxdur. Məktəb tikintisinə bu illər ərzində milyonlar ayıran dövlətimizin tarixində də belə bir təcrübə yoxdur.

İnanmırıq ki, hansısa ölkədə təhsil müəssisəsinin tikintisi üçün dini ibadət yerləri sökülsün.
Şərurlu İsfəndiyarın bu vaxtadək hansısa məktəb tikdirib-tikdirməməsi barədə məlumatımız yoxdur, lakin Təhsil haqqında qanunda da göstərilir ki, Аzərbaycan Respublikasında mülkiyyət növünə görə dövlət, bələdiyyə və özəl təhsil müəssisələri fəaliyyət göstərir.

Yəni əgər kimsə istəyirsə, qanunvericilik çərçivəsində hərəkət edərək məktəb tikdirə bilər. Yox əgər Şərurlu İsfəndiyar bu vaxta qədər hansısa məscidi sökərək yerində məktəb tikmək istəyibsə və ona görə icazə verilməyibsə, bu çox başadüşüləndir.

İş adamımızın nə vaxtsa məktəb tikdirib-tikdirməməsi haqqında axtarış verəndə ötən il onun Bakıda fəaliyyət göstərən kolleci alması barədə məlumatlar rastımıza çıxdı.
Hazırda kollecin faliyyət göstərmədiyi və Şərurli İsfəndiyarın təhsil sektoruna yatırım etmək niyyətinin olmadığı bildirilib. Qanuni təmsilçisi olmasına baxmayaraq iş adamı ümumiyyətlə kollec alması barədə məlumatları təkzib edib.

Ötən gündən bəri tirajlanan və “İmkanım olsa, bütün məscidləri söküb, yerində məktəb tikdirərəm” sözləri cəmiyyətdə birmənalı qarşılanmasa da, nədənsə çoxluq tərəfindən bu açıqlamalar maarifçi bir addım kimi qiymətləndirilib.

Necə düşünürsünüz, sizcə, biznesmenin məqsədi həqiqətən məktəb tikdirməkdir, yoxsa məscidi sökdürmək? Ola bilər ki, bu sadəcə simpatiya qazanmaq üçün deyilmiş sözlərdir.

Hörmətli oxucular nəyi necə qiymətləndirəcəklərini yaxşı bilirlər.

Billurə Yunus