Erkən nikahın qızların həyatına necə mənfi təsir etdiyinə dair işlər aparılacaq
Ölkə.Az xəbər verir ki, layihənin əsas ideyası – erkən nikahın qızların təhsil hüququnu və şəxsi inkişafını necə məhdudlaşdırdığını ictimaiyyətə çatdırmaq, eyni zamanda təhsilin və fərdi inkişafın qızlar üçün prioritet olduğunu vurğulamaqdır.
Sosial əhəmiyyət daşıyan bu layihənin başlıca məqsədi – erkən nikah probleminə cəmiyyətin diqqətini cəlb etmək, onun zərərləri barədə maarifləndirici mesajlar vermək və bu halların qarşısının alınmasına dəstək olmaqdır.
Layihə çərçivəsində Quba rayonunda ssenari əsasında sosial yönümlü qısametrajlı videoçarx çəkiləcək. Video, erkən nikahın fəsadlarını cəmiyyətə hiss etdirərək, təhsilin bir qurtuluş yolu olduğunu vurğulayacaq və ailələri, eləcə də ictimaiyyəti bu məsələyə daha həssas yanaşmağa təşviq edəcək.
3 ay müddətində həyata keçiriləcək layihə, gənc nəslin inkişafında təhsilin rolunu vurğulamaqla yanaşı, ailələr və yerli icmalar arasında sosial məsuliyyətin artırılmasına xidmət edəcək.
Layihə "Ümidli gələcəyin sahibinə nikahla yox, təhsillə yol açaq!” şüarı ilə “Reklam və Marketinq Sahəsinin İnkişafına Dəstək” İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə başlayıb.
