Əfsanəvi kəşfiyyatçı “Gizir Xanı” kim idi? - VİDEO
Ölkə.Az ölümündən sonra dostlarının onun haqqında sosial şəbəkələrdə yazdıqlarını təqdim edir:
Cəsarətli, sadə, olduqca ziyalı idi. Torpaqlarımız işğal altında olduğu müddətdə dəfələrlə əks tərəfə elə keçib qayıdırdı ki, ermənilərin ruhu da incimirdi. Xanı nümunəvi kəşfiyyatçı olmaqla yanaşı əsgərləri üçün tək komandir yox, ata, dayı, əmi idi. Qeyri-adi adam idi. Onun yanında adam ölümə gülə-gülə getmək istəyirdi.
Ləqəbinə gəlincə isə Səyyaf Əhmədov belə deyib: “Mənə ona görə “Xanı” adı verilib ki, bir balaca zümzüməm var. Tədbir olanda Raquf Orucov deyirdi ki, “Xanı”, bir “Ana” segahı oxu. İnanırsınız, bilmirdim ki, Raquf Orucovun anası şəhid olub”.
Birinci Qarabağ müharibəsinin iştirakçısı, Vətən müharibəsinin könüllüsü olan əfsanəvi kəşfiyyatçımız şəhidlərimizə görə heç vaxt özünə ad günü keçirməzdi və hər fürsətdə də deyərdi: “Döyüşdə gördüyünüz qəhrəmanlar öz qardaşından əziz olur. Onları unutmaq olmaz. Həyatda mənim üçün ən vacibi vətəndir. Vətəni sevin!”
Qeyd edək ki, Əhmədov Səyyaf Fiqan oğlu 5 aprel 1971-ci ildə Ağdam rayonunun İsmayılbəyli kəndində dünyaya göz açıb. Sadə ailədə böyüyən Səyyaf kiçik yaşlarından Vətən sevgisi və igidliyi ilə seçilib.
1992-ci ildə könüllü olaraq Azərbaycan Ordusuna yazılan Səyyaf Əhmədov qısa müddətdə ön cəbhəyə göndərilib. Kəşfiyyatçı kimi xüsusi əməliyyatlarda iştirak edib, düşmən arxasında cəsarəti və soyuqqanlılığı ilə seçilib.
Döyüşlər zamanı 3 dəfə ağır yaralanmasına baxmayaraq, heç vaxt silahdaşlarını tək buraxmayıb. Onun həmkəndliləri və döyüş dostları bildirirlər ki, Səyyaf Əhmədov dəfələrlə həyatını təhlükəyə ataraq yoldaşlarını xilas edib.
Onun göstərdiyi qəhrəmanlıqlar dövlət tərəfindən yüksək qiymətləndirilib. Ulu öndər Heydər Əliyev tərəfindən 2 medal ilə təltif olunub:
“Vətən uğrunda” medalı – döyüşlərdə göstərdiyi şücaətə görə;
“Hərbi xidmətdə fərqlənməyə görə” medalı – nümunəvi xidmətlərinə görə.
Bundan başqa, Müdafiə Nazirliyi tərəfindən 5 fərqli medala layiq görülüb.
