Müəllimlərin vahid geyimi hansı formada olacaq? - AÇIQLAMA

Azərbaycanda təhsilverənlərin vahid geyim forması ilə bağlı hüquqi əsas yaradılır. Bu, “Ümumi təhsil haqqında” qanuna dəyişiklik layihəsində öz əksini tapıb. Layihəyə əsasən, dövlət ümumi təhsil müəssisələrində təhsilverənlərin işgüzar geyim üslubu ilə bağlı tələblərin müəyyən edilməsi təsbit olunur. Həmin tələblərin müvafiq icra hakimiyyəti orqanının müəyyən etdiyi qurum tərəfindən müəyyənləşdirilməsi nəzərdə tutulur.

Həmçinin, təklif olunan dəyişikliklərə əsasən, təhsilalanların müəyyən edilmiş geyim qaydalarına riayət etməsinin təmin olunması ilə bağlı valideynlərin və digər qanuni nümayəndələrin vəzifələri dəqiqləşdirilir.

Maraqlıdır, məktəblərdə vahid formaya keçid nə dərəcədə doğrudur? Bu addımı zəruri edən əsas amillər hansılardır?

Təhsil eksperti Elçin Əfəndi Ölkə.az-a açıqlamasında bildirib ki, vahid geyim formasına keçilməsi müsbət haldır:

“Vahid geyim formasına keçilməsinin gözəl bir görüntü yaradacağını düşünürəm. Bu, sosial bərabərlik baxımından vacib elementdir. Eyni zamanda, ümumi təlim-tərbiyə prosesinə də müəyyən qədər müsbət təsir göstərəcək.

Burada fərqləndirmə məsələsi var. Məsələn, indiyə qədər adi geyimlərə üstünlük verilirdi. Daha çox zinət əşyaları, geyimlər və digər bu kimi amillər müəllimləri bir-birindən fərqləndirirdi. Belə deyək ki, biri daha bahalı, digərləri isə sadə geyimlər geyinirdi. İndi isə vahid geyim formatında hər kəs eyni geyimi geyinəcək və burada sosial bərabərlik qorunub saxlanılacaq.

Digər tərəfdən, artıq qarşıdan gələn şəxsin müəllim olduğunu bilirik. Burada bu kimi amillər var və ona görə də qəbul olunan prosesdir. Bu, təkcə bizim ölkədə tətbiq olunmur. Dünyanın inkişaf etmiş ölkələrində də müəllimlər üçün vahid geyim forması və ya "dress-cod" tələbləri tətbiq olunur”.

Ekspert vurğulayıb ki, geyim öz yerində, təhsildə əsas məsələ keyfiyyətin daha da artırılmasıdır: “Təhsilin keyfiyyətinə daha çox diqqət ayırsaq, bu, ümumi təhsil göstəricilərimizin artmasına gətirib çıxarar”.

Həmidə İbrahimova