Bu halda Azərbaycanda işlər dayandırılacaq - AÇIQLAMA

Bunu Ölkə.az-a açıqlamasında Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov isti hava şəraitində əmək təhlükəsizliyi qaydalarından danışarkən deyib.

Onun sözlərinə görə, bəzi işləri dayandırmaq mümkün deyil. Komitə sədri bildirib ki, bu zaman işəgötürən tədbir görməlidir. 

Sahib Məmmədov vurğulayıb ki, texniki təhlükəsizlik qaydalarına xələl gətirmədən, işçilər xüsusi yüngül geyimlərlə təmin etməlidir, onlara həsir şlyapalar paylanılmalıdır və s. 

“Bundan başqa, işə tez-tez fasilə verilməlidir. İş yerinin yaxınlığında açıq havada çətirlər quraşdırılmalıdır ki, işçilər orada tez-tez fasiləyə getsinlər, sərinləşdirici içkilər içsinlər. Ya sərin ayran, ya da sərin qazlı su içsinlər ki, onları gün vurmasın, yaxud istidən əziyyət çəkməsinlər. Qanunda bu yazılıb, amma təəssüf ki, biz praktikada başqa şeylər görürük.

Çölün düzündə, tutaq ki, asfalt döşəyənlər, infrastruktur işlərində işləyənlər açıq havada olurlar, amma heç bir tədbir görülmür. Nəticədə, fərq etməz, onları isti vurmasa da, gün vurmasa da, orqanizmlərinə gün şüalarından xeyli ziyan dəymiş olur. Uzunmüddətli planda onsuz da ziyan çəkmiş olurlar. Amma əslində belə olmalı deyil. Qanunvericilik hamısını tənzimləyir, amma praktikada problemlər var”, - Vətəndaşların Əmək Hüquqlarını Müdafiə Liqası İcraiyyə Komitəsinin sədri bildirib. 

Qeyd edək ki, iyulun 11-də Bakı və Abşeronda 31-36, rayonlarda 33-38 dərəcə isti olacaq.

Həmidə İbrahimova