Araq içib dənizə girənlərin CƏRİMƏLƏNMƏSİ TƏKLİF OLUNUR
Bunu Ölkə.az-a açıqlamasında təhlükəsizlik eksperti Orxan Musayev deyib.
Onun sözlərinə görə, dənizdə üzmək insanların ən çox üstünlük verdiyi istirahət növlərindən və məkanlarından biridir:
“Amma bu gözəllik çox tez və qəfil şəkildə insan həyatı üçün təhlükəyə çevrilə bilər. Bəzən insanlar dənizdə istirahət edərkən onun təhlükəli tərəflərinin olduğunu unudurlar.
Təəssüf ki, spirtli içki qəbul edərək suya girmək, uşaqları nəzarətsiz buraxmaq, qadağan olunmuş ərazilərdə çimmək hələ də adi davranış kimi qəbul olunur”.
Ekspert vurğulayıb ki, insanlar yalnız nəzarət olunan və rəsmi şəkildə fəaliyyət göstərən çimərliklərdən istifadə etməlidirlər. Çünki bu məkanlarda Fövqəladə Hallar Nazirliyinin xüsusi xilasedici heyəti fəaliyyət göstərir:
“Hər hansı fövqəladə hadisə baş verdikdə onların operativ müdaxilə imkanları mövcuddur”.
O.Musayev qeyd edib ki, nəzarətsiz çimərliklərdə isə xilasedici xidmət olmadığından hər hansı fövqəladə hadisə baş verərsə, insan həyatını xilas etmək çox çətin olur.
“Nəzarət olunan çimərliklərdə suyun dərinlik dərəcəsi müəyyən edilir, insanların xəsarət almasına səbəb ola biləcək daşlar, qaya parçaları və digər təhlükəli maneələr təmizlənir”.
O, vətəndaşlara çağırış edib: “Dənizə girməzdən əvvəl hava şəraiti, küləyin gücü və dalğaların hündürlüyü mütləq nəzərə alınmalıdır. Hətta peşəkar üzgüçülər belə meteoroloji amillərin təsiri nəticəsində çətin vəziyyətə düşə bilirlər”.
Ekspert maarifləndirmə və təbliğat xarakterli tədbirlərin daha da genişləndirilməsini təklif edir.
“İnsanlar təkcə “dalğa var, suya girmək olmaz” kimi xəbərdarlıqlarla kifayətlənməməli, dalğaların insan orqanizminə təsirini də bilməlidirlər. Axına düşdükdə nə baş verdiyini, boğulma zamanı insan orqanizmində hansı proseslərin getdiyini öyrənməlidirlər.
Çimərliklərdə qaydalar pozulduqda, məsələn, qadağan olunmuş ərazilərdə çimmək və ya spirtli içki qəbul etdikdən sonra suya girmək kimi hallara görə həm ictimai qınaq, həm də inzibati qaydada cərimə tədbirləri tətbiq olunmalıdır ki, insanlar bu davranışlardan çəkinsinlər.
Boğulma hadisələrinin əksəriyyəti saniyələr içində, səssiz və xəbərdarlıq etmədən baş verir. Yəni insanlar qışqırmır, sadəcə suyun altında gözdən itirlər. Hər il baş verən faciələrin təkrarlanmasının əsas səbəbi ehtiyatsızlıq və “mənə heç nə olmaz” düşüncəsidir. Məhz bu düşüncədən qurtulmağı bacarmalıyıq”, - deyə ekspert vurğulayıb.
Həmidə İbrahimova
