“Bundan qorxduqları üçün müdaxilə etmədilər, müəllimləri də hörmətdən salıblar” – Cüdoçunun qətli

Xəbər verdiyimiz kimi, bir neçə gün əvvəl Azərbaycanda 20 yaşlı cüdoçu 16 yaşlı idmançı yoldaşını bıçaqlayıb.

Sözügedən hadisənin videosunda diqqətçəkən məqamlardan biri də ətrafdakıların tərəfləri ayrımaması, onları videoya çəkməsidir. Bu da insanlar tərəfindən birmənalı qarşılanmayıb.

Gənc yaşda idmançının üzərində bıçaq gəzdirməsindən tutmuş, ətrafındakı insanların hadisəyə müdaxilə etməməsinə qədər bir çox məsələ müzakirə mövzusuna çevrilib.

Məsələ ilə bağlı Ölkə.Az-a danışan Xalq artisti, aktyor, rejissor Şeyx Əbdül Mahmudbəyov laqeydliyin kökündə “polisə düşmək qorxusu”nun dayandığını bildirib:

“Çünki insanlar hüquq-mühafizə orqanlarından çəkinirlər. Onlar şahid olmaqdan, mühakimə edilməkdən qorxurlar. Ona görə də heç kim ağrımaz başına dəsmal bağlamaq istəmir. Deyir ki, nəyimə lazımdır, müdaxilə edəcəyəm, sonra müstəntiqlərin əlində qalacağam. Səbəb budur. Kimdən soruşsan, bu cavabı verəcək. Çünki istintaqdan qorxurlar.

İndi maşallah, hamı operatorluq edir, bir-birini çəkir. Çəkməkdə təhlükə yoxdur, amma hadisənin iştirakçısı və şahidi olmaq artıq məsuliyyətdir”.

Ə.Mahmudbəyov son vaxtlar yeniyetmələr arasında bıçaqlanma hadisəsindən və kökündə dayanan səbəblərdən də danışıb. Onun fikrincə, bu gün əsas problemlərdən biri müəllimlərin ixtiyar sahibi olmamasıdır:

“Azərbaycanda birmənalı şəkildə müəllimlərin hüquqlarının müdafiə komitəsi olmalıdır. Çünki hər şey müəllimin təlim-tərbiyəsindən başlayır. Əgər bu gün müəllim adam yerinə qoyulmursa, onun heç bir səlahiyyəti, söz demək imkanı yoxdursa, dələduz, oğru, əxlaqsız, mənəviyyatsız bir adamın övladına bir kəlmə söz deyə bilmirsə, onda biz nədən danışırıq? Dünyada müqəddəs bir sənət varsa, o da müəllimlikdir. Müəllim ailənin, evin, övladlarının tərbiyəsinin qarantı, mənəviyyətı, dünyagörüşüdür. O müəllimlər ki, it əzabı, Kərbəla müsibəti çəkib, sənin övladının əlindən tutub, ona yazmaq öyrədir, təhsil verir, amma heç nəyə ixtiyarı çatmır. Müəllimin tərbiyəsi uşaqları ailədən daha çox formalaşdırır. Əgər müəllim adam yerinə qoyulmursa, niyə gedib mübahisə edənləri ayırmalıdır. Bunu düzəltmək lazımdır”,- deyə Xalq artisti söyləyib.

Billurə Yunus