ABŞ-dan Türkiyənin sərt bəyanatına gözlənilməz reaksiya

“Ölkə.Az” xəbər verir ki, referendumdan sonra Türkiyənin İraqın ərazi bütövlüyünün qorunmasına dəstək verməyə hazır olması barədə verdiyi bəyanat ABŞ Dövlət Departamenti tərəfindən xoş qarşılanmayıb. ABŞ Dövlət Departamentinin rəsmi nümayəndəsi Xizer Nauert bildirib ki, Türkiyənin bəyanatı hədə kimi səslənir.

“Türkiyə xarici işlər naziri Mövlud Çavuşoğlunun verdiyi bəyanat hədə kimi səslənir. Lakin biz Türkiyənin bəyanatını şərh etməyəcəyik”, - deyə departament rəsmisi bildirib.

Qeyd edək ki, sentyabrın 25-də Şimali İraq Kürd Muxtariyyətının müstəqillik referendumu keçirilib. İraq hökuməti referendumun qanunsuz olduğunu bəyan edib. Türkiyə dövləti referendumu birmənalı olaraq pisləyib. Lakin referendum baş tutub. Səsvermənin nəticələrinə görə, 93 faiz müstəqilliyə “hə”, 7 faiz isə “yox” deyib. Nəticələrə əsasən kürdlər müstəqilliklərini qəbul ediblər.

Referendumdan sonra Türkiyə xarici işlər naziri Mövlud Çavuşoğlu sərt bəyanat verib. O, bildirib ki, Türkiyə İraqın ərazi bütövlüyünü dəstəkləyir və onun qorunmasında hərbi yardımını təklif edib.

“Biz İraqın ərazi bütövlüyünü qeyri-şərtsiz dəstəkləyirik. Əgər rəsmi Bağdad ərazi bütövlüklərinin qorunması üçün bizə müraciət edərsə, biz onlara hərbi yardım göstərəcəyik. Biz bu zaman beynəlxalq hüquqlar əsasında İraq ərazisinə öz ordumuzu yeridə bilərik. Bizim üçün əsas məsələ İraqın ərazi bütövlüyünün qorunması, regionda sülhün bərqərar olmasıdır”, - deyə Çavuşoğlu bildirib.

Ziya Səccad
Ölkə.Az