Obama Rusiyaya qarşı sanksiyaları dəstəkləmədi

ABŞ prezidenti bu addımın Avropa İttifaqı ilə razılaşdırılmasının tərəfdarıdır.

Ölkə.Az TASS agentliyinə istinadən xəbər verir ki, ABŞ prezidenti Barak Obama Amerika Konqressinin Avropa İttifaqı ilə razılaşdırılmadan Rusiyaya qarşı yeni sanksiyaların tətbiq olunmasının əleyhinə çıxış edib.

Amerika biznesi liderlərinin iştirak etdiyi Eksport üzrə şuranın iclasında çıxış edən Obama bildirib ki, bu addım ABŞ və Aİ arasında fikir ayrılıqlarının yaranması və Kremlin apardığı siyasətin dəyişməsinə səbəb ola bilər.

"Birləşmiş Ştatlar və Avropa üçün Rusiyaya qarşı sanksiyaların tətbiq olunması məsələsində birliyi qorumaq vacibdir. Əgər Moskva koalisiyada heç bir çatların olmadığını görsə, başa düşəcək ki, sanksiyaların Rusiya iqtisadiyyatı üçün zərərləri onun Ukraynaya qarşı apardığı siyasətin strateji faydalarından daha çoxdur", - deyə ABŞ lideri bəyan edib.

Məlum olub ki, Avropa İttifaqı Krıma qarşı sanksiyalar siyahısını genişləndirməyi planlaşdırır və hal-hazırda müvafiq sənədin layihəsi hazırlanır. Yeni təkliflərə əsasən, Avropa şirkətlərinin Krım adasında bizneslə məşğul olması qadağan olunacaq.

Rəşid Mustafazadə

Ölkə.Az