ABŞ geriyə addım atdı

Türkiyə prezidenti jurnalistlərin həbsi ilə bağlı əməliyyatdan sonra etdiyi çıxışında Amerikanın da ünvanına tənqidlər deməkdən çəkinmədi.

O, "qərb dövlətləri öz ölkələrində baş verən insan hüquqlarının pozulmasını araşdırsın" açıqlamasını etdi. Amerika Birləşmiş Ştatlarının paytaxtında isə irqi ayrıseçkilik əleyhinə aksiyalar davam edir.

Ölkə.Az xəbər verir ki, ANS TV-nin Vaşinqton bürosu ABŞ-dakı etirazlar barədə ən son məkumatları verir:

“Bildiyiniz kimi son aylarda ABŞ-da qaradərililərin polis tərəfindən öldürülməsinə etiraz olaraq ölkədə geniş aksiyalar və yürüşlər keçirilir. Son 3 həftədir ki, ABŞ-ın bir çox şəhərlərində hər gün etiraz aksiyası keçirilir. Ötən həftədən etibarən əvvəlki günlərdən fərqli olaraq nisbətən artıq hər gün aksiyalar olmasa da, həftənin əvvəlində elan edildi ki, ən izdihamlı yürüş şənbə günü olacaq. Həqiqətən də şənbə günü ölkənin bir çox şəhərlərində böyük aksiyalar təşkil edildi. Paytaxt Vaşinqtonda 10, Nyu-York-da isə 25 mindən çox insanın iştirakı ilə geniş izdihamlı yürüş keçirildi. Aksiya iştirakçıları bildirdilər ki, polislər həbs edilməyənədək onlar sakitləşməyəcəklər və öz aksiyalarını davam etdirəcəklər. Dünən artıq ölkədə sakitlik hökm sürürdü, heç bir aksiya keçirimədi. Amma buna baxmayaraq polislər gücləndirilmiş iş rejimində işləyirlər. Hər an hər hansısa bir şəhərdə, hər hansı bir yerdə yenidən etiraz aksiyası baş qaldıra bilər. Ona görə də polislər hazırlıqlı vəziyyətdədir və bu aksiyalara hazırdır. Ölkədə baş qaldıran bu etirazlardan sonra isə məhkəmə yenidən polislərin işinə baxacağını və şahidlərin yenidən dindiriləcəyini bəyan edib. Amma hələ ki, qaradərililəri öldürən polislər azadlıqdadır və hələ ki, onların həbs ediləcəyi gözlənilmir”. 

Ölkə.Az