Dilənçi erməni veteranları

Rusiya paytaxtındakı "Moskva Evi"ndə Böyük Vətən Müharibəsi veteranlarının iştirakı ilə İkinci Dünya müharibəsi ilə bağlı "dəyirmi masa" keçirilib.

Erməni mətbuatının yazdığına görə, guya tədbirə ancaq ermənilər qatılıb və həmin döyüşlərdə ermənilərin rolu və "qəhrəmanlıq"larından söz açılıb.

"Moskva Evi"nin baş direktoru Armine Tyutyundjan, Ermənistan Veteranlar Birliyinin sədr müavini Mixail Stepanyan Moskva hökumətinə belə tədbirlərin keçirilməsinə və veteranlara göstərdikləri köməyə görə təşəkkür edib və Rusiyaya yaltaqlanıblar: "Ermənistanın və Rusiyanın strateji, hərbi-siyasi əməkdaşlığı uzun illər Ermənistanın təhlükəsizliyi üçün əminlik yaradır."

Sonda iştirakçılara Moskva hökumətinin ənənəvi ərzaq bağlamasından ibarət Yeni il hədiyyəsi paylanan zaman erməni veteranlar dəridən-qabıqdan çıxıblar.

Apardığımız araşdırmaya görə, ermənilər növbəti dəfə ictimaiyyəti aldadıblar. Belə ki, guya bu tədbiri Moskva hökuməti ancaq onlar üçün keçirib və orada erməni veteranlara hədiyyələr verib. Əslində isə, tədbiri ruslar keçirib və ermənilər bura ancaq və ancaq hədiyyə almaq üçün qatılıblar.

Respublika Müharibə, Əmək və Silahlı Qüvvələr Veteranları Təşkilatının bölmə rəhbəri Cavid Kazımov ANS PRESS-ə bildirib ki, ermənilərin vəziyyəti hamı üçün aydındır, dilənirlər, pis gündədirlər. Əgər ermənilər orada da diləniblərsə, veteranları yardım əllərini uzadıblarsa, bu, onların köhnə peşəsidir: "Bizim veteranlar ayda 600 dollar həddində pensiya alırlar, amma ermənilər 80-100 dolar alırlar. Görün, nə qədər fərq var. Hələ Ulu Öndər Heydər Əlievin dövründən başlayaraq, indi isə Azərbaycan prezidenti İlham Əliyev, hökumət tərəfindən vereranlara daim böyük diqqət və qayğı göstərilir. Bizdə prezident təqaüdü verilir, ötən il dövlət pulsuz olaraq veteranlara 300 maşın, onlarla mənzil verib. Bizim iqtisadiyyat güclüdür, neft-qaz sənayesi inkişaf edir."

O, ermənilərin bu məsələni siyasiləşdirdiyini söyləyib: "Guya Rusiya tərəfi ancaq erməni veteranları qiymətləndirir, amma başqalarını yox. Bu, belə deyil. İndi Rusiya pis vəziyyətdədir. Ayrı-ayrı imkanlı adamlar, təşkilatlar, erməni diasporası orada nəsə edib, bunu Rusiyanın adı ilə əlaqələndirmək gülünc doğurur. Bu, erməni fırıldağıdır. Rusiyada indi böyük böhrandır. Bu, diqqətçəkən, araşdırılmalı olan məsələdir. Ermənilər ömür boyu bu işlə məşğul olur, şou göstərirlər. İnanmıram ki, Rusiya hökuməti onlara yardım etsin. Bu işdə erməni məkirliyi var."

Ümumiyyətlə, İkinci Dünya müharibəsində faşizm üzərində qələbədə Azərbaycanın rolunu danmaq öz tarixinin, keçmişinin üstündən xətt çəkməkdir. Onsuz da Azərbaycan övladlarının böyük qəhrəmanlıqları, Azərbaycan neftinin əhəmiyyəti bütün dünya üçün məlumdur. Təbii ki, bəzi ölkələr həmişə Azərbaycana qısqanclıqla yanaşıb, onun inkişafına paxıllıq ediblər. Hətta Bakıya Qəhrəman Şəhər adının verilməməsi də bu paxıllığın nəticəsidir.

Təbii ki, Azərbaycan veteranlarının, eləcə də başqa xalqların veteranlarının belə hədiyyələrə ehtiyacı yoxdur. Amma əsas məsələ bunun mənəvi tərəfidir, İkinci Dünya müharibəsi iştirakçıları indi barmaq sayı qədər qalıb. Bu insanlara fərq qoymadan diqqət göstərmək istər dövlətin, istərsə də təşkilatların, vətəndaşların mənəvi borcudur. Lakin çox təəssüf doğuran hal odur ki, əgər doğrudan da Moskva hökuməti belə tədbir keçirirsə, nə üçün orada təkcə ermənilər iştirak edirlər? Məgər müharibənin taleyini ermənilərmi həll ediblər? Bəs, azərbaycanlılar, belaruslar, ukraynalılar, qazaxlar, özbəklər, moldovanlar, gürcülər və başqa xalqlar?

Ümumiyyətlə, müharibə illəri bəşəriyyətin XX əsrdə üzləşdiyi ən ağır və dəhşətli dövr olub. Azərbaycan xalqının bu müharibədə göstərdiyi əzmkarlıq və qəhrəmanlıqları siyasi və əməli əhəmiyyətə malikdir. Diqqətə çatdırmaq yerinə düşər ki, faşizm üzərində qələbə digər bir çox xalqlar kimi, Azərbaycan xalqının da qanı və külli miqdarda maddi sərvətlərinin itirilməsi, böyük məhrumiyyətlər hesabına əldə edilib. İkinci Dünya müharibəsində həlak olan 57 milyon adamdan 27 milyonu Sovet vətəndaşları olub ki, onlardan da 300 mindən çoxu azərbaycanlılar idi. Amma tarixi faktlar da sübut edir ki, əksər hallarda ermənilər müxtəlif bəhanələrlə ordudan yayınıb, qaçıb gizləniblər.

Vaxtilə Azərbaycan xalqının ümummilli lideri Heydər Əliyev deyib: "Azərbaycan xalqı İkinci Dünya müharibəsində həm döyüş meydanlarında, həm də arxa cəbhədə əsl şücaət və əzmkarlıq nümunələri göstərmişdir. Müharibə başlanandan keçən qısa müddət ərzində Azərbaycan Respublikası ərazisində 87 qırıcı batalyon, 1124 özünümüdafiə dəstəsi təşkil edilmişdir. 1941-1945-ci illərdə respublikanın 600 mindən çox oğlan və qızları cəbhəyə getmişdir."

Xatırladaq ki, Almaniya Sovet İttifaqına qarşı müharibəyə 1941-ci il iyunun 22-də başlayıb. Alman komandanlığı Bakı neftinə xüsusi önəm verirdi və Qafqaz uğrunda vuruşlarda əsas məqsəd Bakı üzərində nəzarəti ələ keçirmək idi.(Anspress)

Ölkə.Az