Kriminal aləm Moskvada toplaşır

Dünyanın bütün "qanuni oğruları" Moskvada ən böyük "sxodka"-ya yığışır.

Ölkə.Az Rosbalt agentliyinə istinadən xəbər verir ki, Rusiyanın paytaxtında MDB və Avropa ölkələrinin nüfuzlu "qanuni oğruları" toplaşmağa başlayıb. Onlar "kriminal generallarının" son illər üçün ən böyük "sxodkasında" iştirak edəcəklər.

Rusiyanın Hüquq-mühafizə orqanlarından bildirilib ki, son günlərdə Moskvaya onlarla nüfuzlu "oğru" təşrif buyurub. Onların arasında uzun illər Yunanıstanda bir sıra Avropa ölkələrində mafiyaları idarə edən David Sebiskveradze (Dato) və Qazaxıstan, Avropa dövlətlərində yaşayan Baja Biqanişvili vardır.

"Dəqiq tarix müəyyən ediməyib, lakin tədbir Yeni İlə qədər keçiriləcək. Əlbəttə, əgər xüsusi xidmət və hüquq-mühafizə orqanları "sxodkaya" mane olmağa çalışmasa" - deyə, mənbə bildirib.

Sözügedən "sxodkaya" çağırışı rus mafiyasının başçısı Zaxariy Kalaşov edib. Kalaşovun planına əsasən, "sxodkada" mafiozlar kriminal mühitdə olan ən vacib münaqişələri və 2008-ci ildən sonra "ailəyə" qəbul edilmiş yeni muzdlu qatilləri müzakirə edəcəklər.

Bütün məsələlər üzrə yekun qərarlar xüsusi məktublar (malyava) formasına tərtib olunacaq. Bu məktublar azadlıqdan məhrumetmə yerlərinə göndəriləcək. Bu məktubların altında 100-dən çox "qanuni oğrunun" imzası olduğu üçün, heç kim qərarları şübhə altına ala bilməz.

Rəşid Mustafazadə

Ölkə.Az