İran yeni pilotsuz təyyarəni sınaqdan keçirdi

İranın quru qoşunları komandanı general Əhməd Riza Purdestan dünən başladılan təlimlər zamanı hədəfə dalaraq özünü yox edən pilotsuz təyyarəni sınaqdan keçirdiklərini bildirib.

Ölkə.Az avropa.info-ya istinadən xəbər verir ki, general Əhməd Riza Purdestan İranın İRNA agentliyinə açıqlaması zamanı Hörmüz boğazında həyata keçirilən hərbi təlimlərdən danışıb.
Purdestan dünən başlayan və bir həftə davam edəcək təlimlər zamanı “Raad” (göy gurultusu) adlı pilotsuz təyyarənin sınaqdan keçirildiyini söyləyib.

O sözügedən təyyarənin 250 km uçuş məsafəsi olduğunu və hədəflərə dəqiq atəş aça bildiyini söyləyib.

Təyyarəni həmçinin “hərəkət edən bomba” kimi səciyyələndirən general bildirib ki, təyyarə havada və quruda müəyyən etdiyi hədəflərin üstünə uçaraq birbaşa təmas halında ikən özünü məhv edə bilir.

Qeyd edək ki, İranın silahlı qüvvələri İnqilab Keşikçiləri taborunun da iştirakı ilə dünən dünya neftinin daşındığı yollardan biri olan Hörmüz boğazında genişmiqyaslı hərbi təlimlərə başlayıb.

Ölkə.Az