"Normand dördlüyü" Ukraynadakı vəziyyəti müzakirə etdi

"Normand dördlüyü" Donbasda atəşkəsin pozulmasını pisləyib.

Ölkə.Az xəbər verir ki, Rusiya prezidenti Vladimir Putin, Fransa prezidenti Fransua Olland, Almaniya kansleri Angela Merkel və Ukrayna prezidenti "Normand dördlüyü" formatında bu gün telefon danışığıda Donbassda vəziyyətin kəskinləşməsini müzakirə ediblər. Onlar atəşkəsə doğru hərəkət etməyin doğru olduğu qərarına gəliblər. Putin isə yaraqlılara təsir edəcəyinə söz verib.

Prezidentlər Minsk razılaşmalarının şərtlərinə, o cümlədən atəşin dayandırılması və hərbi əsirlərin azad olunmasına ciddi riayət etməyin vacib olduğu barədə razılığa gəliblər. Onlar Donbasın bəzi bölgələrində vəziyyətin kəskinləşməsini pisləyib. Bundan əlavə, liderlər ATƏT-in xüsusi monitorinq missiyasının atışmaların davam etdiyi zonalara səfərlərinə şəraitin yaradılması və yalnız tam atəşkəsə nail olduqdan sonra ATƏT-in müşahidəçiliyi ilə reaktiv atəş sistemləri və ağır texnikanın təmas xəttindən çıxarılmasına başlanmasının lazım olduğunu bildiriblər.

Pyotr Poroşenko bildirib ki, Debaltsevoda baş verənlərin guya Minsk razılaşmasına uyğun olduğu haqqında rəy yaratmaq doğru deyil. Ukrayna prezidenti əldə olunan razılaşmaların bundan sonra da pozulması ehtimalına qarşı dəqiq zəmanətin işlənib hazırlanmasının mühüm olduğunu vurğulayıb. O, bütün əsirlərin buraxılmasını tələb edib. Ukrayna tərəfi bu danışıqlara təmas xətti və Ukrayna-Rusiya sərhədinə sülhməramlı qüvvələrin cəlb olunması məsələsinin də daxil edilməyini tələb edib.

Xatırladaq ki, 18 fevralda ukrayna qoşunları uzunmüddətli döyüşlərdən və separatçıların mühasirəsinə düşdükdən sonra Debaltsevonu tərk ediblər. Qondarma Donetsk Xalq Respublikasında bəyan ediblər ki, Debaltsevoda aparılan hərbi əməliyyatlar atəşkəs haqqında razılaşmanın təsirinə düşmür, çünki şəhər özünü elan etmiş respublikanın nəzarətindədir.

Rəşid Mustafazadə

Ölkə.Az