Belarus İraqa yardım etmək istəyir

"...hər zaman dost olmuşuq və dost olaraq qalacağıq"

Ölkə.Az "Rosbalt" agentliyinə istinadən xəbər verir ki, Belarus İraqla ticarət-iqtisadi, təhsil və hərbi-texniki sahələrdə əməkdaşlığın inkişaf etdirilməsində maraqlıdır.

Bu barədə Belarusun prezidenti Aleksandr Lukaşenko bəyan edib.

"Biz münasibətlərimizi daha yüksək səviyyəyə çatdırmalı, onların bünövrəsini qurmalıyıq. Bu həm ticarət-iqtisadi, həm də indiki İraqın spesifikasına uyğun olaraq hərbi-texniki əməkdaşlıq ola bilər", - deyə Lukaşenko İraqın xarici işlər naziri İbrahim Əl-Cəfəri ilə görüşdə deyib.

O qeyd edib ki, tərəflər təhsil sahəsində qarşılıqlı əlaqədədirlər və Belarus bundan sonra da tibb və texniki təhsil müəssisələrində təhsil almaq üçün iraqlı tələbələri qəbul etməyə hazırdır.

"Belarusun əsas marağı sabit İraqdır. Əgər biz İraqda sabitliyin bərqərar olunması üçün hansısa şəkildə yardım edə bilsək, bunu mütləq edəcəyik, hər zaman olduğu kimi. İraqdakı vəziyyətdən asılı olmayaraq biz əmin olmalıyıq ki, hər zaman dost olmuşuq və dost olaraq qalacağıq", - deyə dövlət başçısı əlavə edib.

Rəşid Mustafazadə

Ölkə.Az