İraqda avtomobil partladıldı

Bağdadda avtomobilin partlaması nəticəsində 7 nəfər dünyasını dəyişib.

Ölkə.Az "Al Arabiya" telekanalına istinadla xəbər verir ki, İraqın paytaxtı Bağdadın qərbində avtomobilin partlaması 7 nəfərin ölümü, 18 nəfərin ağır yaralanmasına səbəb olub.

Bildirilir ki, bu, terrorçuların növbəti əməliyyatıdır. Naməlum şəxs Əl-Amil rayonunda minalanmış avtomobili partladıb. Bağdad polisi qeyd edir ki, terakt qubanlarının sayı arta bilər. Hələlik heç bir ekstremist qruplaşma hadisəyə görə məsuliyyəti üzərinə götürməyib.

Xatırladaq ki, bir neçə gün öncə İraqın paytaxtında baş verən şiddətli partlayış nəticəsində 15 nəfər həlak olub. İraq polisinin verdiyi məlumata əsasən, intiharçı-terrorçu Laden şəhərində yerləşən restorana daxil olaraq üzərində yerləşdirdiyi partlayıcı qurğunu işə salıb.

Birləşmiş Millətlər Təşkilatının (BMT) İraqla bağlı yaydığı son hesabata görə, təkcə ötən ay ərzində bu ölkədə 997 nəfər terror hücumları nəticəsində həlak olub. Mart ayı ərzində baş verən terror aktları zamanı isə 2172 nəfər yaralanıb. Ölənlərin 268 nəfəri İraq ordusunun hərbçiləri, digərləri isə mülki vətəndaşlar olub.

Rəşid Mustafazadə

Ölkə.Az