Misirdə "Müsəlman Qardaşlığı"na növbəti zərbə
Misirin Ağır Cinayətlər Məhkəməsi 2013-cü ilin hərbi çevrilişi zamanı polis məntəqəsinə hücumla əlaqədar 22 nəfəri ölüm cəzasına məhkum edib.
Barələrində ən ağır cəza çıxarılmış müttəhimlər İslamçı prezident Mursinin hakimiyyətdən kənarlaşdırılmasına qarşı etirazlar zamanı polis məntəqəsinə basqın etməkdə və 1 polis zabitini qətlə yetirməkdə təqsirli bilinib.
Giza şəhərində keçirilən məhkəmə iclasında bundan başqa şübhəlilər qanunsuz silah saxlama, vandalizm, dövlət əmlakına ziyan vurma, adam öldürmə, adam öldürməyə cəhd etmə maddələri üzrə ittiham olunub. Müttəhimlərin səkkizi hələ tutulmadığından onlar barəsində ölüm hökmü qiyabi olaraq oxunub. İğtişaşlarda iştirak etmiş bir azyaşlıya isə 10 il həbs cəzası verilib.
Qeyd edək ki, Müsəlman Qardaşlığı tərəfdarlarına kütləvi ölüm cəzasının verilməsinə görə Misir insan haqqları təşkilatlarının tənqid hədəfinə çevrilib.
Ölkə.Az
