Zəlzələ qurbanlarının sayı artır

Nepal rəsmiləri keçən həftə baş vermiş zəlzələdən sonra daha çox sağ qalanların tapılacağını istisna edirlər. 

Zəlzələ nəticəsində ölənlərin sayı artıq 6621 çatıb.

“Biz xilasetmə işlərində əlimizdən gələni edirik, lakin indi inanmıram ki, sağ qalan kimisə tapmaq mümkün olsun,” daxili işlər naziri Laxmi Prasad Dhakal AFP-yə deyib. Nepal bildirir ki, keçən şənbə baş vermiş 7.9 bal gücündə zəlzələ nəticəsində 14021 insan xəsarət alıb. Ucqar ərazilərdə minlərlə insanın taleyi naməlum olaraq qalır. Yüksək ərazilərdə xilasetmə işləri davam etdikcə, ölü sayı arta bilər, xilasetmə işlərinin koordinatoru Hemanta Pal bildirib.

İtkilər əsasən Nepalda baş versə də, qonşu Hindistan, Tibet və Banqladeşdə təxminən 100 nəfərin öldüyü bildirilir. Aİ-nın Nepaldakı səfiri Rensje Teerink cümə günü bildirib ki, 1000 nəfər Aİ vətəndaşının harda olması hələ də məlum deyil. Nepal davamlı olaraq daha çox xarici dəstək və humanitar yardım üçün çağırışlar edərək, fəlakətə hazırlıqsız olduğunu etiraf edib.

Torpaq sürüşmələri və pis hava şəraiti təcrid olunmuş ərazilərə yardım daşınması işini də çətinləşdirib və xilasetmə işləri üçün yalnız 20 vertolyot var.

Ölkənin informasiya naziri Minendra Rijal Associated Press xəbər agentliyinə bildirib ki, Nepalın 400000 çadıra ehtiyacı var, lakin indiyə qədər yalnız 29000 çadır paylamaq mümkün olub. (qafqazinfo)

Ölkə.Az