Ben Ladenin gizli məktubları üzə çıxdı

"Əl-Qaidə" rusları Yəmənə göndərirmiş.

Ölkə.Az Yaxın Şərq mətbuatına istinadən xəbər verir ki, ABŞ Milli kəşfiyyatı Usama Ben Ladenin arxivindən Rusiya vətəndaşları ilə bağlı məktubları üzə çıxarıb.

"Ben Ladenin kitab rəfi" saytına yerləşdirilən sənədlərdən məlum olur ki, "Əl-Qaidə" Yəmənin islam universitetlərindən birində təhsil alan rusiyalı müsəlmanları sıralarına cəlb edirmiş.

2008-ci ilə aid olan məktubdan aydın olur ki, qruplaşmanın Mahmud adlı fəal üzvü Ben Ladena "verbovka"nın "Əl-İman" universitetində keçdiyi barədə məlumat verir. Sən demə, bu proseslərin hamısı təhsil müəssisəsinin təsisçisi, vaiz Əbdul Məcid az-Zindani tərəfindən kurasiya edilib.

Mahmud yazır ki, gizli söhbətlərdən sonra rusiyalı müsəlmanlar ailələri ilə birlikdə cihad yolunu seçirmiş. Az-Zindaninin ünvanına deyilən müəyyən tənqidə baxmayaraq, məktub müəllifi onun xüsusi xidmətlərini və verdiyi töhfələri qeyd edir.

"Xaricdəki fəaliyyət barədə hesabat" adlı məktubunda Laden yazıb:

"Bir neçə qardaşımızı hazırlıq üçün Britaniya, Rusiya və Avropaya göndərmişik. Məqsəd isə ilin sonuna kimi işə hazır olmaqdır".

O qeyd edib ki, terrorçuların hədəfi Rusiyada qaz xətti və ya ABŞ səfirliyi, Böyük Britaniyada isə qardaşların uyğun gördükləri hədəflər olmalı imiş.

Xatırladaq ki, 2011-ci il may ayının 1-də ABŞ prezidenti Barak Obama "Əl-Qaidə" şəbəkəsinin lideri Usama Ben Ladenin öldürüldüyünü bildirib.

Rəşid Mustafazadə

Ölkə.Az