Nyu-York İranla razılaşmaya qarşı çıxdı

Nyu-Yorkda minlərlə insan İranla əldə olunmuş razılaşmaya qarşı çıxdı.

Ölkə.Az "Associated Press" agentliyinə istinadən xəbər verir ki, Nyu-York şəhərinin bir neçə min sakini "Times Square"ə çıxaraq "altılıq" ölkələrinin İranla nüvə proqramı üzə razılaşmasının əngəllənməsini tələb ediblər.

Etiraz aksiyasına toplaşanlar "İranın yarışı dayandırılsın", "Müqavilə ləğv edilsin" kimi şüarlar səsləndiriblər. Təşkilatçıların fikrincə, Vaşinqton razılaşma vasitəsilə Tehrana nüvə bombası əldə etməyə və dünyada terroru yaymağa kömək edir.

Xatırladaq ki, iran nüvə proqramı üzrə əldə olunmuş razılaşma BMT-nin Təhlükəsizlik Şurasının bütün sanksiyaları və milli sanksiyaların ləğvi, ticarət, texnologiya, maliyyə və energetika sahələrinə girişini ehtiva edir. İran isə 15 il ərzində nüvə yanacağının hazırlanması ilə bağlı heç bir elmi tədqiqatların aparılmamasını öhdəsinə götürür. Bundan əlavə, İranda zəif zənginləşdirilmiş uran ehtiyatları 15 il ərzində 300 kq normadan artıq olmamalıdır.

İran prezidenti bildirib ki, artıq İranı heç kim təhlükəsizliyə təhdid adlandırmayacaq. Fars körfəzinin bir çox ölkələri İranla "altılıq" ölkələri arasında imzalanması nəzərdə tutulan nüvə sazişi ilə bağlı öz narahatlığını ifadə edib.

Rəşid Mustafazadə

Ölkə.Az