“Putin mart ayına salamat çıxmaya bilər” - Mixail Pritula

Ukrayna müharibəsi fonunda Kremldə həm də ciddi hakimiyyət mübarizəsi gedir. Vladimir Putinin mövqeyi nəzərəçarpan dərəcədə zəifləyib. Sosial sorğular rusiyalıların ona əvvəlki qədər inanmadığını göstərir. Rusiya elitasında da bu inamsızlıq xüsusi diqqət çəkir. Hiss olunur ki, Putinin hakimiyyəti itirməsinə elə də çox qalmayıb.

Ölkə.az Bizimyol.info-ya istinadən xəbər verir ki, Rusiyada hakimiyyət mübarizəsi bir az da kəskinləşib. Hərbi ekspert Mixail Pritula bunun mütləq nəticəsi olacağını düşünür. Onun fikrincə, Putin 2023-cü ilin martına çıxmaya bilər.

Pritula çox əmindir ki, Putin yazın əvvəlində Ukraynaya yeni qüvvələrlə hücum etmək üçün növbəti səfərbərlik dalğası həyata keçirmək niyyətindədir. Ancaq Rusiya prezidentinin özünün yazın əvvəlinə qədər sağ qalıb-qalmayacağı sual altındadır.

“Rusiyada artıq bataqlıqlarda hakimiyyət uğrunda mübarizə başlayıb. Orada varis olmaq istəyən yeni personajlar peyda olur. Bu, Priqojin, Patruşev, Narışkin, Bortnikov və Lavrov ola bilər ki, bu istiqamətdə müəyyən addımlar atılır. Artıq Rusiyada hakimiyyətin başqa şəxsə tranzitinə doğru irəliləyən müəyyən qruplar var. Priqojinin hakimiyyətini bulandırmağa yönəlmiş müəyyən hərəkətlər diqqət çəkir. Başqa hərbi kampaniyalar yaratmağa çalışırlar ki, Priqojinin inhisarında olmasın. Kreml vəziyyətin belə inkişafından qorxur və bu gün Putinin hakimiyyətini təhdid edən də budur”.

Pritula müharibənin Ukraynanın tam qələbəsi ilə başa çatacağına əmindir. Onsuz da döyüşlərin gedişi belə sonluğa işarə vurur. Ukrayna silahlı qüvvələri müharibənin əvvəlində itirdiyi əraziləri sürətlə geri qaytarmağa başlayıb. Kiyev çox inamlı təsir bağışlayır. Krımın da işğaldan azad ediləcəyi inandırıcı görünür. Pritula hesab edir ki, qış ərzində Rusiya hakimiyyətindəki çatlar dərinləşəcək. Döyüşlərdəki məğlubiyyətlər özünü göstərəcək. Putin ən azı dövlət başçısı postunu əldən verə bilər. Amma onun fiziki olaraq sıradan çıxarılması da mümkündür. Hərbi ekspert hadisələrin məhz belə sonluğuna daha çox inanır.