Türkiyə İŞİD məsələsində ABŞ-la razılığa gəldi

Türkiyə İŞİD-ə müstəqil zərbələr endirməyəcək

Ölkə.Az xəbər verir ki, Türkiyə hökuməti ABŞ-ın beynəlxalq antiterror koalisiyasından kənar Suriyada İŞİD terror təşkilatı üzərinə müstəqil hava zərbələrinin endirilməməsi təklifinə müsbət cavab verib.

Bu barədə məlumat ABŞ Dövlət departamentinin mətbuat xidmətinin rəhbəri Con Kirbi tərəfindən verilib.

"Biz Türkiyə hökumətini beynəlxaq antiterror koalisiyasına inteqrasiya etməyənə qədər sıx hava məkanında koalisiya üçün reallaşdırılan hava əməliyyatlarının təhlükəsizliyi məqsədilə Suriyada İŞİD mövqeləri üzərinə müstəqil hava zərbələri endirməməyi xahiş etdik. Və türklər razılaşdı", - deyə Kirbi brifinqdə bildirib.

Xatırladaq ki, Türkiyə terrorla genişmiqyaslı mübarizəyə iyulun 20-də Suruçda baş verən terror aktından sonra başlayıb. Bu akt nəticəsində 32 nəfər ölüb, onlarla insan ağır yaralanıb.

Türkiyə Hava Qüvvələri Suriya ilə sərhəddə yerləşən İŞİD hədəflərini bombalayıblar. PKK isə bundan istifadə edərək ölkədə bir çox etiraz aksiyaları və nümayişlər keçirib, magistral yollarda avtomobillərə hücum edib, onları yandırıb.

Ölkədə son bir ayda baş verən silahlı hücumlar nəticəsində 20-dən çox şəhid verilib.

Rəşid Mustafazadə

Ölkə.Az