Putinin iki dostu qanunsuz surətdə Finlandiya vətəndaşlığını alıb - Skandal

Rusiya prezidenti Vladimir Putinin iki dostu, iş adamları Gennadi Timçenko və Boris Rotenberq mövcud prosedurdan yan keçərək Finlandiya vətəndaşlığını alıblar. Onların vətəndaşlıq üçün müraciətləri Finlandiyanın Təhlükəsizlik Polisi tərəfindən təsdiqlənməyib.

Musavat.com xarici agentliklərə istinadən xəbər verir ki, bu barədə Finlandiyanın “İltalehti” qəzeti məlumat yayıb.

Məlum olub ki, hər iki ərizə ilə bağlı Miqrasiya Xidməti xüsusi xidmət orqanlarının rəyini almayıb. Üstəlik, Timçenko məsələsində proses elə təşkil olunub ki, əks-kəşfiyyatın işə qarışmağa sadəcə vaxtı da olmayıb. Qəzetin Təhlükəsizlik Polisindəki anonim mənbəsinin sözlərinə görə, müraciətə baxılması prosesi elə təşkil olunub ki, həmin vaxt idarədə demək olar ki, hər kəs yay tətilində olub.

Rotenberq və Timçenko 1998-ci ildə Finlandiya vətəndaşlığı üçün müraciət ediblər. Rotenberqin müraciəti 2002-ci ildə şərti olaraq təsdiqlənib, Finlandiya pasportunu əldə etmək üçün iş adamı rus pasportundan öncə vaz keçib, sonradan isə onu bərpa edib.

Finlandiya mediası Timçenkonun müraciətinin də "olduqca sürətlə" gözdən keçirildyinə diqqət çəkib. O, artıq 1999-cu ildə pasport alıb. Agentlik qeyd edir ki, ərizə verən zaman Timçenko, Rotenberqdən fərqli olaraq, artıq varlı olub və Miqrasiya Xidməti rəhbərinin dostu ilə ortaq iş görürmüş.

Bu vəzifəni daha sonra Matti Saarelainen tutub. Əks-kəşfiyyat onun Timçenkonun vətəndaşlıq əldə etməsindəki rolunu araşdırmağa başlayıb.

“İltalehti” Timçenkio ilə bağlı başqa faktları da üzə çıxarıb.

Məlum olub ki,  Timçenko əvvəllər əslində Təhlükəsizlik Polisinin maraq zonasında olub. Belə ki, rusiyalı gələcək milyarder 1990-cı illərin əvvəllərində İsveçdən qovulmuş bir DTK agentinin qurduğu şirkətə rəhbərlik etmək üçün Finlandiyaya gəlibmiş.

Sonradan Kremlin himayəsi ilə həmin şirkət Sankt-Peterburq yaxınlığından ucuz neft gətirib və onu Finlandiyada sataraq böyük qazanc əldə edib.. İndi Timçenkonun sərvətini “Forbes” jurnalı 11,3 milyard dollar olaraq qiymətləndirir.