\"The Guardian\": Gizli Ukrayna batalyonu Rusiyada təxribat hazırlayır

 Rusiyada təxribat təşkil edən Ukrayna xüsusi təyinatlı qüvvələrinin “Qardaşlıq”  məxfi batalyonu var. Kiyev bu batalyonun mövcudluğunu həssaslıqla gizlədir. "Ölkə.az" xəbər verir ki, bu barədə Britaniyanın “The Guardian” qəzeti məlumat yayıb.

Nəşr qeyd edir ki, məxfi batalyon Rusiyanın yüksək rütbəli məmurlarının oğurlanması, Rusiyanın əsas hərbi infrastrukturunun məhv edilməsi və ölkə ərazisində təyyarələrin vurulması ilə məşğuldur.

Batalyonun Vladislav adlı üzvü "The Guardian"a bildirib ki, onlar üçün Rusiya sərhədini keçmək asan olub.

"Qardaşlıq"ın digər üzvü Aleksey etiraf edib ki, batalyon öz fəaliyyətində mülki şəxslərdən istifadə edir.

Döyüşçülərin dediyinə görə, ay yarım əvvəl onlar Rusiya Daxili İşlər Nazirliyinin yüksək rütbəli məmurlarının olduğu vertolyotu dörd kilometr məsafədən "MANPADS" ilə vurublar, lakin, onlar partlayışı görməyiblər.

“İlk dəfə pis hava şəraiti lazer nişangahının hədəfi dəqiq vurmasına mane oldu. Bundan əlavə, qrup daxilində problemlər, mübahisələrimiz oldu, buna görə də Rusiya Federasiyasının ərazisindən geri döndük, səhvlərimizi nəzərə aldıq və bir həftə sonra ikinci cəhdi etdik" - deyə batalyonun digər üzvü Taras bildirib.

Bundan əvvəl bildirilmişdi ki, Rusiya Federasiyası Federal Təhlükəsizlik Xidmətinin (FTX) Sverdlovsk vilayəti üzrə əməkdaşları dəmir yolu infrastrukturunda terror aktları hazırlamaqda və törətməkdə şübhəli bilinən üç rusiyalını saxlayıb.

Elvin

Ölkə.az