Putin MDB-nin vahid valyuta bazarını yaradır

Rusiya hökuməti MDB-də vahid valyuta bazarının yaradılması haqqında sazişi prezident Vladimir Putinə təqdim edəcək

Rusiya Nazirlər Kabineti Müstəqil Dövlətlər Birliyinin (MDB) vahid valyuta bazarının yaradılması haqqında sazişin ratifikasiya olunması üçün sənədi ölkə prezidenti Vladimir Putinə təqdim etmək qərarına gəlib.

Bu barədə Rusiya hökumətinin saytında yerləşdirilmiş qərarın mətnində qeyd olunub.

“Sazişin ratifikasiya olunması tərəflərin bank-rezidentlərinin konversiya əməliyyatlarında bərabər hüquqlu və qarşılıqlı fayda götürməklə iştirakını təmin edəcək. Bu, iqtisadi əməkdaşlığın gələcəkdə inkişafına, MDB çərçivəsində inteqrasiya proseslərinin daha da dərinləşməsinə şərait yaradacaq”, - deyə məlumatda vurğulanıb.

Qeyd edək ki, Rusiyanın baş naziri Dmitriy Medvedev avqustun 13-də bəyan edib ki, MDB ölkələri arasında valyuta bazarının inteqrasiya olunması ilə bağlı razılaşmanın ratifikasiya olunması quruma üzv ölkələrin razılaşdırılmış valyuta siyasətinə imkan verəcək. Bu valyutaların alış və satışı zamanı yaranan fərqlərə vəsaitin xərclənməməsi ilə nəticələnəcək.

Ekspertlər hesab edir ki, bu razılaşmanın ratifikasiyası MDB ərazisində iqtisadi əməkdaşlığın daha da dərinləşməsinə şərait yaratmaqla gələcəkdə vahid valyutaya keçidi təmin edə bilər.

Yeri gəlmişkən, bu ilin aprelində Qazaxıstan prezidenti Nursultan Nazarbayev MDB-nin vahid valyuta bazarının təşkili üzrə əməkdaşlıq haqqında razılaşmanı ratifikasiya edib.

Xatırladaq ki, MDB-yə üzv ölkələr 2012-ci ildə Aşqabadda keçirilən sammitdə ümumi valyuta bazarının yaradılması barədə razılığa gəlib. Hazırda Azərbaycan, Belorus, Qazaxıstan, Qırğızıstan, Moldova, Ukrayna, Rusiya, Tacikistan, Türkmənistan, Özbəkistan və Ermənistan MDB-nin üzvləridir.

Ölkə.az