Mətn ölçüsü:
  • 100%

Qərbin Ukraynaya müasir qırıcılar vermək fikri yoxdur - CNN  

Xəbər verildiyi kimi Polşa prezidenti Ancey Duda Ukraynaya qırıcı təyyarələrin verəcəyini vəd edən ilk NATO ölkəsi lideri olub.

Duda yaxın günlərdə dörd “MiQ-29” qırıcısının Ukraynaya təhvil veriləcəyini açıqlayıb. Dörd döyüş təyyarəsi əslində, az görünə bilər. Lakin cəmi bir il öncə bu təklifin səslənməsi belə ağlasığmaz sayılırdı.

"Ölkə.az" xəbər verir ki, bununla bağlı CNN telekanalının saytında maraqlı analitik süjet yayımlanıb.

Süjetdə Polşanın vədindən bir gün keçməmiş Slovakiyanın baş naziri Eduard Heqerin Ukraynaya  13 ədəd MiQ qırıcısı göndərəcəyi barədə fikirləri qeyd olunub. Çox güman ki, digər Avropa ölkələri də öz hava qüvvələrini modernləşdirdikcə, sovet istehsalı olan köhnə MiQ-ləri Ukraynaya təhvil verəcəklər.

Kanal ekspertlərinin fikrincə, əslində, Polşa bu yolla “MİQ”lərdən qurtulmaq istəyir. Ötən il rəsmi Varşava Cənubi Koreya ilə 48 ədəd “FA-50” yüngül təyyarəsinin alınması da daxil olmaqla 14,5 milyard dollarlıq tarixi müqavilə imzalayıb. Bundan başqa Polşa öz hava donanmasına ABŞ-ın “F-35 Lighting II” qırıcılarını daxil edib.

Məlum səbəblərə görə, Ukrayna Hərbi Hava Qüvvələrinin dəqiq tərkibi hələ ki sirr olaraq qalır.

“Ukrayna Sovet İttifaqının dağılmasından sonra, onlarla “MiQ-29” təyyarəsinə sahib olub. Lakin Krımın ilhaqından sonra onun donanması xeyli zəifləyib.

“MiG-29”lar köhnə analoq sistemlərlə, Zelenskinin tələb etdiyi F-16-lar isə rəqəmsal sistemlərlə çalışır. MiQ-lərdən qısa uçuşlar üçün istifadə olunur və onlar yaxın məsafədən yaxşı manevr qabiliyyətinə malik Rusiya təyyarələrini vura bilirlər. Lakin F-16-lar daha uzun müddət uça bilir, çox yönlüdür, ən müasir silah sistemlərinə malikdir və təkmilləşdirilmiş erkən xəbərdarlıq sistemi sayəsində əhəmiyyətli dərəcədə daha yaxşı uzaq mənzilli və radar imkanlarını daşıyır.

Londondakı Müttəfiq Qüvvələr İnstitutunun (RUSI) tədqiqatçısı, müdafiə üzrə analitik Aleks Uolmslinin MiQ-lərlə “F-16” lar arasında fərqi “1990-cı illərdəki noutbuku - ən son MacBook” və ya “Ford Escort -Porsche”  kimi təsvir edib.

“Prinsipcə, onlar eyni şeyi edirlər. İkisi də uçur, raket buraxır, lakin MIQ-lər o qədər də həssas və güclü deyil”,-deyə hərbi ekspert qeyd edib.

ABŞ rəhbərliyi hələ də  Rusiya ilə eskalasiyanın dərinləşməsindən ehitiyat edərək, həmçinin qırıcıların Ukraynaya praktiki fayda gətirməyəcəyini əsas göstərərək, rəsmi Kiyevə F-16-ların verilməsi barədə çağırışlara “qulaqlarını tıxayır”. Münaqişənin kataklizm dərəcəsindən qaçmaq istəyi bu həftə Rusiya təyyarəsinin Qara dəniz üzərində 32 milyon dollarlıq “Reaper” pilotsuz uçuş aparatını vurmasından sonra da özünü göstərib. Məlum olduğu kimi Ağ Ev son insidentə olduqca yumşaq reaksiya nümayiş etdirdi.

Bundan əlavə Ukrayna hərbçilərinin qısa müddətdə “F-16”ları idarə edə bilmək qabiliyyətinə şübhə ilə yanaşılır. Ukraynada pilotların çatışmazlığından isə heç danışmağa dəyməz.

İstefada olan general-leytenant Mark Hertlinq qeyd etdiyi kimi ukraynalılar HIMARS və “Javelin” kimi quru döyüş vasitələrinə çox yaxşı uyğunlaşsalar da, F-16 “tamamilə fərqli bir oyuncaq” sayılır.

Telekanala danışan ekspertlərin rəyinə görə, ilk vəd edilən qırıcılar Ukraynanın hava hücumundan müdafiəsinin səviyyəsini artırsa belə, vəziyyəti ciddi şəkildə dəyişməyəcək və Ukraynaya münaqişədə ciddi üstünlük verməyəcək.(Musavat.com)