Fransa yenidən qarışdı - 149 polis yaralandı - FOTO

Fransada milyonlarla insan ölkədə pensiya yaş həddinin 62 yaşdan 64 yaşa qaldırılmasına etiraz olaraq küçələrə axışıb.

“Ölkə.Az”  Fransa mediasına istinadən xəbər verir ki, aksiya iştirakçıları hökumətdən parlamentdə səsvermə olmadan yekun olaraq qəbul edilən islahatdan imtina etməyi tələb ediblər. Aksiyalar təkcə paytaxt Parisdə deyil, ölkənin müxtəlif əyalət və şəhərlərində də keçirilir. Aksiya zamanı polislə nümayişçilər arasında qarşıdurma və toqquşmalar baş verib. 

Fransa daxili işlər naziri Gerald Darmanın  verdiyi məlumata görə, toqquşma zamanı 149 polis və jandarma əməkdaşı yaralanıb. 172 aksiya iştirakçısı saxlanılıb. Nazir onu da bildirib ki, aksiyalar nəticəsində ölkə üzrə baş verən  yanğından 140-ı söndürülüb, 50 isə davam edir. 

Aksiya iştirakçıları Parisdə küçələrindəki zibil qutularını yandırıb, avtobus dayanacaqlarını dağıdıblar. Nümayişçilər Bordo şəhər bələdiyyəsinin darvazasını da yandırıblar.  

Parisdə aksiyalar hələ də davam etməkdədir.

Bununla belə ölkənin aparıcı həmkarlar və tələbə həmkarlar ittifaqlarının birgə bəyanatında insanları islahat əleyhinə həftə sonu və martın 28-də nümayişlərə və çərşənbə axşamı tətilə çağırıblar.

Təşkilatçıların məlumatına görə, Fransada nümayişlərdə 3,5 milyon, Daxili İşlər Nazirliyinin məlumatına görə isə 1 milyon 89 min nəfər iştirak edib.

Mürtəza

Ölkə.Az