Ermənilər kütləvi şəkildə cəbhəyanı kəndləri boşaldırlar

“Biz burada yaşamırıq, sadəcə, mövcuduq”.

Cəbhə xəttində yerləşən Ermənistanın Tavuş vilayətinin Koti kəndi sürətlə boşalır.

Ölkə.Az-ın APA-ya istinadən verdiyi məlumata görə, kənd sakini Aykaz Azibekyan bildirib ki, artıq o da kəndi tərk etmək barədə düşünür. Kənd məktəbində uşaqların sayının 25 faizə qədər azaldığını nəzərə çatdıran A. Azibekyan həm təhlükəsizlik, həm də maddi durumlarının ağır olması səbəbindən başqa çıxış yolu olmadığını söyləyib. A. Azibekyan deyib ki, getməyə yer olsaydı, çoxdan ölkəni tərk edərdilər: “Düşünürük ki, Rusiyaya, yoxsa başqa ölkəyə gedək?! Biz burada yaşamırıq, sadəcə, mövcuduq”.
 
Kənd sakini 52 yaşlı Anna Siradeqyan da yaşayışından şikayət edib:

“Nə qədər dözmək olar? Bilmirəm, barəmizdə düşünürlər, ya yox. Bütün insanlar gecə gərgin vəziyyətdə olur, nə yuxu, nə də sakitlik var. Bunun sonu nə vaxt olacaq? Artıq kənd boşalır. Mən də kəndi tərk edə bilərəm. Kimin imkanı var, Rusiyaya gedir”.

Ölkə.Az