Braziliya Azərbaycandan faydalanmalıdır - Klaudio Kajado

Coğrafi mövqeyinə görə Azərbaycan Avropa və Asiya arasında tranzit nöqtəsi kimi əsas rol oynayır ki, bu da Braziliya və iki qitədə danışıqlar aparan logistika şirkətləri tərəfindən daha yaxşı istifadə edilməlidir

Ölkə.Az xəbər verir ki, bunu Braziliya-Azərbaycan Parlamentlərarası Dostluq Qrupunun sədri deputat Klaudio Kajado Milli Məclisinin Azərbaycan-Braziliya Parlamentlərarası Əlaqələr üzrə İşçi Qrupunun rəhbəri, deputat Müşfiq Məmmədli ilə görüşündə deyib.

Azərbaycanın Cənubi Qafqazda çox mühüm rola malik olan ölkə olmaqla yanaşı, Orta Asiya ilə mühüm dəhliz rolunu oynadığını yan ölkə olduğunu vurğulayan deputat bildirib ki, bu iki ölkə arasında sıx əməkdaşlıqlar üçün çox böyük imkanlar yaradır.

“Ölkələrimiz arasında sıx əməkdşalıq üşün böyk potensial mövcuddur və hər iki tərəf bundan faydalanmalıyıq. Parlament olaraq biz də bu işdə öz töhfəmizi verməliyik”, - Klaudio Kajado bildirib.

Müşfiq Məmmədli isə öz növbəsində bildirib ki, Latın Amerikası qitəsində Braziliya ilə münasibətlərin inkişaf etdirilməsi Azərbaycan üçün xüsusi önəm daşıyır.

Görüşdə Brazilyaya səfərinin məqsədindən danışan deputat Müşfiq Məmmədli bildirib ki, iki ölkə arasında diplomatik əlaqələrin qurulmasının 30 illiyini qeyd etmək və hər iki ölkənin parlamentlərarası əməkdaşlıq xəttinin gücləndirilməsi perspektivlərini müzakirə etməkdir.

Görüşlərdə 30 il ərzində Azərbaycan ilə Braziliya arasında yaranmış dostluq münasibətlərinə nəzər salınıb, münasibətlərin cari statusu barədə fikir mübadiləsi aparılıb və qarşılıqlı maraq doğuran məsələlər müzakirə olunub.

M.Məmmədli Qarabağ məsələsinin həll edildiyini, Azərbaycanın regionda artan nüfuzu, Prezident İlham Əliyevin apardığı daxili və xarici siyasət barədə braziliyalı deputatlara ətraflı məlumat verib, müxtəlif beynəlxalq təşkilatlarda ölkəmizə göstərilən dəstəyə görə Braziliya tərəfinə təşəkkürünü ifadə edib.

O eyni zamanda, 16 avqustda da BMT Təhlükəsizlik Şurasında keçirilmiş müzakirələrdə Braziliyanın səsləndirdiyi mövqeyinə, Xankəndi-Ağdam yolunun istifadəsinin vacibliyi ilə əlaqədar sərgilədiyi mövqeyinə görə təşəkkürünü bildirib.

İki ölkə arasında əməkdaşlıq istiqamətləri, mümkün layihələr barədə, bu münasibətlərin suverenliyə hörmət və praqmatizmə əsaslanaraq inkişaf etməsi vacibliyi qeyd edilib. İki ölkə arasında astronavtika, peyk-fəza araşdırmaları, peyk texnologiyalarından iqtisadi yönlü layihələr üçün istifadəsi, səhiyyə, təhsil, infrastruktur və sosial yönümlü siyasət kimi sahələrdə əlaqələri gücləndirmək niyyəti ifadə olunub.

Braziliyalı siyasətçilər və rəsmiləri, Braziliyanın Azərbaycanın strateji mövqeyindən yararlanmaq üçün əməkdaşlığın daha da intensivləşdirilməsi və bu xüsusda, parlamentlər arasında dialoqun möhkəmlənməsinə tərəfdar olduqlarını, Azərbaycanın öz ölkələri üçün regionda unikal tərəfdaş ola biləcəyinə inamlarını ifadə ediblər.

Görüşdə iştirak edən Azərbaycanın bu ölkədəki səfiri Rəşad Novruz isə deyib ki, əlaqələrin qurulmasından 30 il keçib və kommersiya məsələləri də daxil olmaqla əməkdaşlığı gücləndirməyin vaxtı çatıb: “Biz istəyirik ki, gələcək illərdə bu əməkdaşlıq daha da məhsuldar olsun”. Diplomat onu da qeyd edib ki, Qərbi Asiyanın Transqafqaz regionunda strateji mövqedə yerləşən və Xəzər hövzəsində geniş enerji ehtiyatlarına malik Azərbaycan Braziliyanın regiondakı maraqları üçün unikal tərəfdaş ola bilər.

Deputat M.Məmmədli Braziliya Konqresinin Nümayəndələr Palatasının sədrinin müavini, federal deputat Sostenes Kavalkanti, Xarici əlaqələr və milli müdafiə üzrə Daimi komissiyası sədrinin birinci müavini, federal deputat Flavio Noqeyra, Federal Senatın Texnologiya, elm və innovasiyalar üzrə Komissiyasının sədri senator Karlos Viana və Braziliyanın Kosmik Agentliyinin rəhbəri Antonio Şamon ilə görüşərək müzakirələr aparıb.

Mürtəza
Ölkə.Az