Zelenskinin bunker həyatı - Sifəti saralıb, boyat çörək yeyib…

Ukrayna Prezidenti Volodimir Zelenskinin tərcümeyi-halının müəllifi, "Time" qəzetinin jurnalisti Saymon Şuster siyasətçinin hərbi əməliyyatların başlanmasından sonrakı ilk günlərdəki bunker həyatını təsvir edib. 

Ölkə.Az xəbər verir ki, Saymon Şusterin “Şoumen” kitabında Zelenski bunkerdə yaşayarkən günəş işığının və təmiz havanın olmamasından onun sifətinin saraldığını yazıb. İlk günlərdə yetərincə yemək olmayıb. 

Şuster yazır: “Rəsmi görüşlərdə şirniyyat paylanırdı, ümumi mətbəxdə isə ət konservləri və boyat çörəklər olurdu”.

Müəllif qeyd edir ki, bunkerdə ərzaq tədarükü sonradan normal vəziyyətə salınıb. Səhər yeməyində Zelenski qayğanaq yeyirdi, köməkçiləri isə hot-doq, kartof və qulyaş hazırlayırdı. Bunkerdə spirtli içki ehtiyatı olub. Ukrayna Prezidenti bəzən naharda ona qoşulan həmkarlarına şərab süzürdü.

Bunker sakinləri bəzən filmlərə baxırdılar. Çox vaxt Hollivudun yeni filmlərini seçirdilər. Jurnalist yazır ki, Volodimir Zelenski sovet komediyalarına baxmaqdan imtina edib. Hərbi əməliyyatlar başlayandan sonra bu filmləri mənasız hesab edirdilər. Bunkerdə Ukrayna Prezidentinin gecələr istifadə etdiyi qantellər və tennis stolu da olub.

Müəllif qeyd edir ki, 2023-cü ilin noyabrında Zelenski Ukrayna ərazisindəki münaqişənin tez bitməyəcəyini söyləyib. O həmçinin filmlərdə olduğu kimi cəbhədəki hadisələrin daimi dəyişməsini gözləməməyə çağırıb.

Mürtəza
Ölkə.Az