İzmirdə taksi sürücülərinə qənim kəsiliblər: daha biri vuruldu - VİDEO/FOTO

Türkiyənin İzmir şəhərindən sərnişin taksi sürücüsünə xəsarət yetirib.

Ölkə.Az Türkiyə mediasına istinadla xəbər verir ki, sürücü taksiyə əl qaldıran sərnişinə artıq işləmədiyini deyib.

Daha sonra sərnişin qəzəblənərək sürücünü söyüb və aralarında dava baş verib. Sərnişin sürücünün kürəyinə qayçı ilə xəsarət yetirib.

Sürücü yaşadığı anları izah edib:

“Mən çayxananın qarşısında dayanarkən bir vətəndaş əlini uzadıb “boşsan” deyə soruşdu. Maşını söndürdüyümü dedim, sonra içəri keçdim. Bir fincan çay içib evə qayıdacaqdım. Səhər saat 08.00-da işə başladım, gecə saat 02.30 radələrində maşını söndürürəm.

Həmin vaxt təzyiqim bir az düşmüşdü və evə yemək yeməyə gedirdim. Evə gedəndə həmin adamı bir daha gördüm. Məni söyməyə başladı. Həmin vaxt dedim ki, qardaş məni söyürsən? O, əlində qayçı ilə təhqiramiz danışmağa başladı. Niyə belə etdiyini soruşdum. Daha sonra onu yerə yıxdım və o an qayçını kürəyimə soxdu.

Dövlətimizdən bu məsələ ilə bağlı tədbir görülməsini istəyirik.

Ötən gün taksi sürücüsü qardaşımızı və həmkarımızı öldürdülər. Bu gün növbə bizdədir. Biz heç kimə zərər vermirik. Əksinə, xidmət edirik. Həmin şəxsin üzərindən qayçı, ülgüc aşkar edilib. Mən başa düşmürəm, bu necə adamdır.

Həkim “qayçı 2 sm daha dərinə girsəydi, reanimasiyaya aparacaqdıq” dedi. Bu qəsdən adam yaralamaqdır. Bu adam öldürməyə cəhddir”.

Hücum edən şəxs haqqında cinayət işi davam etdirilir.

Günay