Tramp: \"Səddam Hüseyn və Qəddafi qalsaydı, dünya daha yaxşı olardı...\"

"Mən demirəm ki, Hüseyn yaxşı oğlan olub, o çox iyrənc oğlan idi..."

Ölkə.Az-ın xəbərinə görə, ABŞ-da Respublikaçılar partiyasından prezidentliyinə namizəd Donald Tramp "CNN" telekanalına müsahibəsində bildirib ki, əgər İraq və Liviyada dövlət çevrilişləri olmasaydı, Yaxın Şərqdə vəziyyət daha yaxşı olardı.

"Mən 100% əminəm ki, Səddam Hüseyn və Müəmmar Qəddafi hakimiyyətdə qalsaydı, dünya daha yaxşı olardı. Baxın İraqa - orada əvvəllər terrorçular olmayıb, Hüseyn onları yerindəcə məhv edirdi. İndi isə İraq terrorçuların Harvardına çevrilib. Mən demirəm ki, Hüseyn yaxşı oğlan olub, o çox iyrənc oğlan idi, ancaq indi hər şey olduqca bərbaddır. Liviyada isə nə baş verdiyini heç kim anlamır", - deyə Tramp qeyd edib.

Bir müddət öncə Donald Tramp NBC telekanalında "MeetThe Press" verilişində Yaxın Şərqdəki vəziyyətlə bağlı önəmli açıqlamalar verərək bildirib ki, Yaxın Şərq Müəmmar Qəddafi və Səddam Hüseynin hakimiyyəti dövründə müqayisə edilməz dərəcədə dinc idi.

Tramp bu fikirlərini Obamanın təkidlə Suriyanın prezidenti Bəşər Əsədin devrilməsinə qarşı arqument kimi təqdim edib. O bəyan edib ki, Rusiyanın Suriyadakı hərbi fəaliyyətini dəstəkləyir və qeyd edib ki, Dəməşqdə rejimin devrilməsi nəticəsində Əsədin yerinə daha pis diktator gələ bilər.

Qeyd edək ki, keçirilən sorğulara əsasən, Donald Tramp respublikaçı namizədlər arasında liderdir. İndiyədək seçki kampaniyalarında səbəbkar olduğu qalmaqalların onun reytinqinə müsbət, yoxsa mənfi təsir etdiyi isə hələ də bilinmir. Donlad Tramp kampaniyalar zamanı cəmiyyət içində rəqiblərindən birini təhqir edib, teledebat işçiləri ilə mübahisə edib və Respublikaçılar partiyasının bir neçə üzvü ilə dalaşıb.

Rəşid Mustafazadə

Ölkə.Az