İranın Qorbaçovu?

İranda keçirilən növbədənkənar prezident seçkisində islahatçı namizəd Məsud Pezeşkian qalib gəldikdən dərhal sonra bir çoxu onu keçmiş SSRİ-nin ilk və son prezidenti Mixail Qorbaçovla müqayisə etməyə başlayıb.

Bu barədə Oxu.Az "Azad İran" "YouTube" kanalında dərc olunan yazıya istinadən bildirir.

"Məsələn, iyulun 8-də, yəni Məsud Pezeşkianın seçkidə qələbəsindən cəmi iki gün sonra İran hakimiyyətinə müxalif "Iran International" televiziya kanalı populyar analitik proqramı olan "Çeşməndaz", yəni "Perspektiv" verilişində "Pezeşkian İranın Qorbaçovu olacaqmı?" mövzusunda ekspert müzakirəsi təşkil etmişdi. Əlbəttə, hələ səlahiyyətlərinin icrasına başlamamış prezidentin siyasi fəaliyyətinin çoxdan tarixə qovuşmuş bir şəxslə müqayisəsi yetərincə qüsurludur. Aydındır ki, burada sadəcə Pezeşkianın seçkiqabağı çıxışlarındakı islahat diskursuna istinad olunur və Qorbaçovun SSRİ-ni dəyişdirdiyi kimi, onun da İranı dəyişdirəcəyi tezisindən çıxış edilir. Amma hansı niyyətlə edilməsindən asılı olmayaraq, həmin müqayisə Pezeşkianın ziyanınadır, çünki Qorbaçov həm də tarixə SSRİ-nin dağılmasına səbəb olan bir siyasətçi kimi düşüb və ona bənzədilməsi İran ictimai rəyinə Pezeşkianın da bəyan etdiyi islahatları həyata keçirəcəyi təqdirdə ölkənin dağılmasına yol açacağı fikrini aşılayır.

Bununla belə, həmin mövzu getdikcə daha çox müzakirə olunmaqdadır. Belə ki, dünən, iyulun 18-də "Arman-e emruz" qəzeti özünün birinci səhifəsində Məsud Pezeşkian barədə "İranlı Qorbaçovun manifesti" başlıqlı məqalə dərc edib. Məsələnin qəribə cəhəti odur ki, sözügedən qəzet Pezeşkianı dəstəkləyən islahatçı cərəyana bağlıdır, bu da həmin məqalənin, xüsusən onun başlığının qalmaqal doğurmasına səbəb olub, eyni zamanda Pezeşkianın əleyhdarlarına əməlli-başlı fürsət verib.

Məsələn, seçkidə Pezeşkianın rəqibi olan Səid Cəlilinin yaxın silahdaşlarından biri kimi tanınan parlamentin deputatı Əmirhüseyn Sabiti özünün "X" səhifəsində yazıb: "Əgər Pezeşkianın tənqidçisi olan bir qəzet ona "İranlı Qorbaçov" ləqəbi versəydi, təəccüblü olmazdı, çünki Qorbaçov Amerikaya etimadda sadəlövhlüyü ilə məşhurdur ki, bu da son nəticədə SSRİ-nin dağılmasına səbəb oldu. Amma Pezeşkianın tərəfdarı olan bir qəzet də indidən onu Qorbaçov adlandırırsa, deməli, təhlükə düşündüyünüzdən daha yaxındır!" - deyə yazıda qeyd edilib.

Daha ətraflı videosüjetdə: