Rus hərbçisinə sui-qəsd cəhdi edən şəxs Bodrumda saxlanıldı

İyulun 24-də Moskvanın şimalında Müdafiə Naziriliyinin hərbçisinə məxsus "Land Cruiser" markalı avtomobilin altına partlayıcı qurğu yerləşdirən Yevgeni Serebryakov Türkiyənin Bodrum şəhərində saxlanılıb.

Ölkə.Az xəbər verir ki, avtomobilin partlaması nəticəsində rus zabiti ayaq nayihəsinin aşağı hissəsini itirib, avtomobildə yanında əyləşən həyat yoldaşı da ağır yaralanıb.

"Kommersant"ın yazdığına görə, hadisə yerinə gələn əməliyyatçılar müşahidə kameralarından və avtomobilin videoregistratorlarından çəkilmiş yazıları götürərək, partlayışdan bir neçə saat əvvəl “Land Cruiser”də naməlum şəxsin olduğunu tez bir zamanda müəyyən ediblər. Kameralarda bir şəxsin “Land Cruiser”in sürücü tərəfinin altına əşya yerləşdirdiyi yer alıb. Bundan sonra naməlum şəxs avtomobil dayanacağı ilə üzbəüz uşaq meydançasında təxminən on bir dəqiqə vaxt keçirərək, minalanmış avtomobili telefonuna çəkərək hadisə yerindən uzaqlaşıb. Bu zaman onun üzü kameralara düşüb.

Əməliyyatçılar şübhəlinin sonrakı yolunu izləyiblər. Bəlli olub ki, həmin şəxs icarəyə götürdüyü avtomobillə Vnukovo hava limanına yollanıb və oradan Türkiyənin "Pegasus" aviaşirkətinin çarter reysi ilə Bodruma uçub. İstintaq araşdırması zamanı bu şəxsin Rusiya vətəndaşı Yevgeni Serebryakov olduğu müəyyənləşdirilib.

Moskva məhkəməsi vaxt itirmədən Yevgeni Serebryakovun qiyabi həbsinə dair vəsatətinə dərhal baxıb, İnterpola və Türkiyəyə şübhəlinin saxlanması ilə bağlı sorğular göndərilib.

Türkiyədə hüquq-mühafizə orqanlarının çevik reaksiyası nəticəsində hadisədən cəmi 12 saat sonra Serebryakov yerli polis tərəfindən saxlanılıb.

Hələlik istintaqın prioritet versiyası Yevgeni Serebryakovun Ukrayna xüsusi xidmət orqanlarının göstərişi ilə hərəkət etməsidir.

Ehtimal olunur ki, hadisədə şübhəli bilinən Serebryakov çox yaxın vaxtlarda Rusiyaya təhvil veriləcək.

İHA-nın verdiyi xəbətə görə, Bodrumda saxlanılan şübhəli nəzarət altında xəstəxanaya aparılıb və orada tibbi müayindən keçib.

Mürtəza
Ölkə.Az