İsrail İranı qabaqlayır: Hücuma hazırlaşır

İsrail HƏMAS-ın siyasi lideri İsmayıl Haniyənin ölümündən sonra İsrail ərazisinə pilotsuz təyyarələr və raketlərlə hücum edə biləcək İrana ilk zərbə endirmək imkanını nəzərdən keçirir. 

Ölkə.Az "Ynet" portalına istinadən xəbər verir ki, bu məsələ avqustun 4-də axşam İsrailin baş naziri Benyamin Netanyahu ilə ordu rəhbərliyi və kəşfiyyat xidmətləri arasında keçirilən görüşdə müzakirə olunub.

Görüşdə müdafiə naziri Yoav Qalant, İsrail Ordusunun Baş Qərargah rəisi Herzi Halevi, Mossad kəşfiyyatının rəhbəri David Barnea və Baş Təhlükəsizlik Xidmətinin (əks-kəşfiyyat) rəhbəri Ronen Bar iştirak edib. 

"Ynet"in məlumatına görə, Tel-Əviv Tehrandan hücumun qaçılmaz olduğunu sübut edən kəşfiyyat məlumatları əldə edəcəyi təqdirdə, İsrail  İranı qabaqlayaraq ilk zərəbəni endirəcək.

Bildirilir ki, İsrailin İrandan öncə belə bir addım atmaqda məqsədi Tehranı eskalasiyadan çəkindirmək olacaq.

"The Times of Israel"in yazdığına görə isə Tel-Əviv hələlik İran və onun regiondakı müttəfiqlərindən nə gözlədiyini bilmir. Buna görə də  İsrail mümkün hücuma cavab vermək və ya onun qarşısını almaq üçün tədbirlər görmək üçün “geniş variantları” müzakirə edir. 

Bu arada ABŞ İsrailə hücumun avqustun 5-i bazar ertəsi başlayacağına inanır. Məlumatlı mənbələrin "Axios" portalına verdiyi məlumata görə, ABŞ-nin dövlət katibi Antoni Blinken G7 ölkələrinin xarici işlər nazirləri ilə konfransda deyib. Eyni zamanda Blinken bildirib ki, Vaşinqtonda hücumun hansı formada olacağı barədə məlumat yoxdur. 

Mürtəza
Ölkə.Az