Rusiya bu ərazidə baza yaradır - Salome Zurabişvili

“Rusiya Abxaziyada donanma üçün yeni daimi baza yaratmağa çalışır”.

Ölkə.Az xəbər verir ki, bunu Gürcüstan Prezidenti Salome Zurabişvili Tiflisdə yerli və beynəlxalq mətbuat nümayəndələri qarşısında çıxış edərkən deyib.

“Oçamçire bazası üçün hazırlıq işləri aparılır. Bu, ciddi bir problemdir, çünki sadəcə bizim üçün deyil, eyni zamanda bütün Qara dənizin təhlükəsizliyi üçün problemdir”,- deyə o söyləyib.

Gürcüstan prezidenti həmçinin ölkəsinin baş naziri İrakli Kobaxidze və bütün hökuməti Rusiyanın işğal etdiyi Abxaziya və Cənubi Osetiya regionlarına qarşı effektiv siyasət yürütməməkdə ittiham edib.

Zurabişvili bu 2 bölgədəki insanlara Gürcüstan vətəndaşlığı verilməsi gərəkdiyini bildirib. Onun sözlərinə görə, adı çəkilən ərazilərdə yaşayan xalqın Gürcüstana və onun imkanlarına olan marağı artıb.

Billurə Yunus