Taliban bu dəfə də qadınların səsini və üzünü qadağan etdi

Əfqanıstanda Taliban hökuməti qadınlarla bağlı yeni qanun qəbul edib.

Ölkə.Az xəbər verir ki, qanun ictimai nəqliyyat və ictimai şənliklər kimi gündəlik həyatın müxtəlif sahələrini əhatə edir.

Bu qanunlara qadınların üzünü, bədənini və səsini evdən kənarda gizlətmək öhdəliyi daxildir.

13-cü maddəyə görə, qadınlar ictimai yerlərdə başqalarını təhrik etməmək üçün bədənlərini və üzlərini örtməlidir. Paltarları nazik, dar və ya qısa olmamalıdır. 
Qadınların səsi, mahnı oxuması, uca səslə nəyisə oxuması və ya ictimai yerdə danışması da məhrəm sayıldığı üçün qadağan edilib.

Sürücülərə qadın sərnişinləri müşayiət edən kişi olmadan da daşımaq qadağandır.

Qanun pozulduğu halda Şərin Qarşısının Alınması və Fəzilətin Yayılması Nazirliyi insanlara xəbərdarlıq və həbs kimi cəzalar verə bilər.

114 səhifə və 35 maddədən ibarət bu qanunlar 2021-ci ildə Taliban hakimiyyəti ələ keçirdikdən sonra dərc olunan ilk rəsmi əxlaq qanunlarıdır.

Birləşmiş Millətlər Təşkilatı yeni etik kodeksləri pisləyib.

Qeyd edək ki, Taliban həmçinin 2022-ci ildə qadınların altıncı sinifdən sonra məktəbə getməsini qadağan edib. Əvvəllər qadınlar orta və ali məktəblərə gedə bilirdilər.

Billurə Yunus