Cərrahın azyaşlı qızı əməliyyat zamanı xəstənin başında deşik açdı

Avstriyada bir beyin cərrahının əməliyyat zamanı verdiyi inanılmaz qərar eşidənləri şoka salıb.

Ölkə.Az xarici KİV-ə istinadla xəbər verir ki, yanvarda Avstriyada meşəlik ərazidə başından yaralanan şəxs helikopterlə ölkənin cənub-şərqindəki Qraz Universitet Xəstəxanasına gətirilib.

İddiaya görə, xəstəni əməliyyat edən beyin cərrahı 13 yaşlı qızının da əməliyyata girməsinə və xəstənin başında deşik açmağa icazə verib.

Əməliyyatın yaxşı keçdiyi, xəstənin müalicəsinin davam etdiyi bildirilsə də, gözlənilməz hadisə baş verib.

Bu ilin aprelində Qraz Prokurorluğuna sözügedən əməliyyatla bağlı anonim şikayət daxil olub.

Avstriya mətbuatı adı açıqlanmayan xəstənin baş verənləri mediadan öyrəndiyini və iyula qədər xəstəyə polis tərəfindən məlumat verilmədiyini yazıb.

“Orada yatırsınız. İstəksiz, huşsuz və kobaya (heyvan növü) dönürsünüz. Bunu ifadə etməyin başqa bir yolu yoxdur. Bu, mümkün deyil. Bunu edə bilməzsiniz. Heç bir ünsiyyət, açıqlama ya da üzr, heç bir şey yoxdur. Bu, bir sözlə, şərəfsizlikdir”,- deyə xəstənin vəkili söyləyib.

Vəkil həmçinin əməliyyatda iştirak edən şəxsləri məhkəməyə verəcəklərini və təzminat tələb edəcəklərini söyləyib.

Cərrahi əməliyyatda iştirak edən beyin cərrahı və mütxəssis həkim işdən çıxarılıb. Digər 5 nəfər barəsində isə cinayət işçi açılıb.

Billurə Yunus