İsrailin Livana son hücumu: İranın ali lideri fövqəladə iclas çağırdı

İsrailin son günlərdə Livanda "Hizbullah"a qarşı davamlı hücumları, xüsusən də sentyabrın 27-də Beyrutun cənubuna güclü hava zərbələri endirməsi Tehranla-Təl-Əviv arasında münasibətlərin yenidən gərginləşməsinə səbəb olub.

Ölkə.Az xəbər verir ki, İsrailin "Hizbullah"ı zərərsizləşdirmək üçün seçdiyi taktika Tehranı ciddi narahat etməyə başlayıb.  

Bu səbəbdən də İranın Livandakı səfirliyi cümə günü İsrailin Beyrutun cənub ətraflarında sıx məskunlaşan Hizbullah qalası adlandırdığı yerə bir sıra intensiv zərbələr endirməsini pisləyib və Yaxın Şərqdə "təhlükəli eskalasiya" barədə xəbərdarlıq edib.

İran səfirliyinin X-dəki (tvitter) mesajında "Bu qınanılası cinayət... təhlükəli eskalasiyaya yol açır və oyunu dəyişdirir" qeyd olunub.

Açıqlamada həmçinin bildirilib ki, İsrailin oyun qaydasını dəyişməsi, cəzasız qalmayacaq və müvafiq cəzanı alacaq.

İran Xarici İşlər Nazirliyinin sözçüsü Nasser Kənani isə bəyan edib ki, bu hücuma görə həm İsrail, həm də ABŞ məsuliyyət daşımalıdır.

Bu gərginlik fonunda isə İranın ali lideri Əli Xameneyi ölkənin Ali Milli Təhlükəsizlik Şurasının fövqəladə iclasını çağırıb. İclasda Livanda "Hizbullah"a qarşı hücumlar və Tehranın atacağı addımlar müzakirə edilib.

Mürtəza
Ölkə.Az