Nazir: Zəngəzur dəhlizi həm İran, həm də Ermənistandan keçə bilər

Azərbaycanın şərq rayonlarından Naxçıvana nəqliyyat dəhlizi həm İran, həm də Ermənistan ərazisindən keçə bilər.

Ölkə.Az xəbər verir ki, bunu Türkiyənin nəqliyyat və infrastruktur naziri Əbdülqadir Uraloğlu Kanal7-yə müsahibəsində bildirib.

Onun sözlərinə görə, burada İran ərazisindən keçən hissədə 61 km, Ermənistan ərazisindən keçən hissədə isə 43 km-lik yoldan söhbət gedir.

Nazir əlavə edib ki, Zəngəzur dəhlizi Bakı-Tbilisi-Qars xəttinə alternativ və ya onun imkanlarını artıracaq dəhlizdir. 

"Layihə Xəzər dənizini keçərək Azərbaycandan Ermənistana və ya İrana, oradan isə Naxçıvan, Dilucu, İğdır, Qarsa keçəcək. Azərbaycan tərəfinin mühüm hissələri tikilib, Naxçıvan tərəfdə mövcud xəttin bərpasına başlanacaq, Türkiyə tərəfində 224 km-lik tender keçirmişik, qarşıdakı mərhələdə tikintiyə başlayacağıq”, - Uraloğlu qeyd edib.

Nazir bildirib ki, Azərbaycan layihənin reallaşması ilə bağlı həm İrəvan, həm də Tehranla danışıqlar aparır: "İlkin olaraq İran məsələsində müəyyən irəliləyiş əldə olunub və son günlər Ermənistan tərəfi ilə bağlı inkişaf var ki, bu da yaxın günlərdə bəlli olacaq”.

Nazirin fikrincə, yaxın gələcəkdə onlar Azərbaycandan keçən ən qısa dəhlizlə türk dünyasına qoşulacaqlar.

Mürtəza
Ölkə.Az