Livanlı nazir Culani ilə görüşdü - Nələr müzakirə edildi?

Livan yeni Suriya hökuməti ilə Suriya-Livan sərhədinə nəzarəti müzakirə edib.

Ölkə.Az xəbər verir ki, Dəməşqə gedən Livanın baş naziri Nəcib Mikatinin başçılıq etdiyi nümayəndə heyəti Heyət Təhrir əl-Şam (HTŞ) lideri Əhməd əl-Şaraa (əl-Culani) və Suriyanın xarici işlər naziri Əsəd Həsən əl-Şibani ilə görüşüb. Tərəflər ikitərəfli münasibətlərin inkişafı və regionun üzləşdiyi problemləri müzakirə ediblər.

Görüşdən sonra Mikati və əl-Culani arasında birgə mətbuat konfransı keçirilib.

Sonuncu qeyd edib ki, Suriyanın yeni hakimiyyət orqanları üçün hazırkı prioritet daxili vəziyyəti həll etmək, həmçinin Suriya-Livan sərhədinin demarkasiyasıdır.

Mikati öz növbəsində, qaçaqmalçılıq, xüsusilə də silah qaçaqmalçılığının qarşısını almaq üçün Suriya və Livan sərhədində nəzarətin təmin edilməsinin zəruri olduğunu vurğulayıb.

Məlumata görə, İsrail və HƏMAS arasında müharibə başlayandan bəri yuxarıda adı çəkilən sərhəd dəfələrlə Hizbullah üçün nəzərdə tutulan İran silahlarının Suriyadan Livana keçirilməsi üçün istifadə olunub.

Bundan əlavə, Livanın yeni prezidenti Cozef Aun bildirib ki, silah daşımağa yalnız ordu və rəsmi təhlükəsizlik qüvvələrinə icazə verilir, digər qruplar isə tərksilah ediləcək.

Onun bu çıxışının Hizbullaha yönəlik olduğu bildirilir.

Qeyd edək ki, Livan parlamenti ordu komandanı Cozef Aunu ölkənin 14-cü prezidenti seçib.