Böyük Britaniya da İŞİD-i vurur

Böyük Britaniyaya məxsus qırıcı təyyarələr İraqda anti-İŞİD əməliyyatlarına başlayıb.

Bir neçə gün əvvəl Britaniya parlamenti hərbi hava qüvvələrinin anti-İŞİD koalisiyasına qoşulması üçün qərar qəbul etmişdi.

Britaniya qırıcları Kiprdəki aviabazadan havaya qalxıb. Ölkənin Müdafiə Nazirliyi terrorçuların mövqelərini müəyyən edən kimi bombalama əmrinin icra olunacağını bildirib.

ABŞ hərbi hava qüvvələri isə Səudiyyə Ərəbistanı, İordaniya və Birləşmiş Ərəb Əmirliklərinə məxsus qırıcı təyyarələrlə birgə İŞİD silahlarının daha bir neçə mövqelərini bombalayıb. Əməliyyatlar çərçivəsində, eyni zamanda, Suriyanın Türkiyə ilə sərhəd şəhəri Kobanidə də terrorçuların mövqeləri vurulub. Aviazərbələr nəticəsində isə silhalıların iki hərbi avtomobili və mərkəzi post binası dağıdılıb. Bu barədə Pentaqon açıqlama verib.

ABŞ generalı Martin Dempsi İraq və Suriyaya quru qoşunlarının yerdilməsini vacib hesab edib. Onun sözlərinə görə, təkcə aviazərbələrlə İŞİD üzərində tam qələbə qazanmaq mümkün olmayacaq.

ABŞ prezidenti Barak Obama bir müddət əvvəl quru qoşunlarının əməliyyatlarda iştirak etməyəcəyini demişdi.

Əməliyyatlarla əlaqədar çıxışında Britaniyanın baş naziri Devid Kemeron isə anti-İŞİD koalisiyasının İraq hökuməti tərəfindən idarə olunmasını alyansın vacib məqamlarından biri adlandırıb. “Biz hamımız beynəlxalq bir koalisiyanın vahid oyunçusuyuq. Burada qanuni rəhbər İraq hökuməti və onun ordusudur. Bu dəhşətli terror təşkilatının dağıdılmasında öz rolumuzu oynamalıyıq” – deyə Kemeron qeyd edib. (Anspress)

Ölkə.Az