Gürcüstanda fırtına: ölənlər var

Gürcüstanın qərb vilayətlərində güclü yağışın yaratdığı selin ardından Qara dənizdə başlayan fırtına bölgədə vəziyyəti daha da çətinləşdirib.

Fırtına zamanı artıq insan itkiləri də qeydə alınıb. Qara dənizin Acarıstan sahillərində bir neçə gündür davam edən güclü fırtına sahil boyu ərazilərdəki tikililərə xeyli ziyan vurub. Ötən gün axşam saatlarında baş verən 6 ballıq fırtına zamanı 55 yaşlı gürcü vətəndaşı dəniz sularında batıb. Daha bir nəfərin isə Çorox çayında batdığı xəbər verilir. Bölgədə təxminən bir həftədir davam edən güclü yağış, sel və fırtına ölkənin turizm zonası kimi tanınan bir sıra şəhərlərinə ciddi ziyan vurub.

Gürcüstanın baş naziri İrakli Qaribaşvili bildirib ki, Qərbi Gürcüstanda qeydə alınan təbii fəlakətin bölgəyə vurduğu maddi ziyan dövlət büdcəsi hesabına aradan qaldırılacaq.

Sinoptiklərin yaxın günlər üçün bölgədə hava şəraiti ilə bağlı verdikləri proqnozlar da ürəkaçan deyil. (ANS TV)

Ölkə.Az