ABŞ Orta Şərqə aviadaşıyıcı göndərir
Ölkə.az xəbər verir ki, İranda 28 dekabrdan bəri davam edən etirazlardan sonra ABŞ-nin Tehran rəhbərliyinə təzyiqi artıb. ABŞ Prezidenti Donald Trampın müdaxilə ilə bağlı açıqlamalarından sonra Vaşinqton administrasiyası bölgədəki hərbi mövcudluğunu gücləndirmək qərarı alıb.
ABŞ-nin "The Wall Street Journal" qəzeti yazır ki, Trampın oktyabr ayında "USS Gerald R. Ford" aviadaşıyıcı qrupunu Aralıq dənizindən Karib hövzəsinə göndərmək qərarı hazırda İrana qarşı mümkün hər hansı hücumda iştirak edəcək aviadaşıyıcı qrupların bölgədə olmaması anlamına gəlir. Bu isə Tehranla əvvəlki gərginlik dövrləri ilə müqayisədə fərqli bir vəziyyətdir. Qəzet ABŞ Hərbi Dəniz Qüvvələrinin rəsmisinə istinadən bildirir ki, hazırda ABŞ-nin Karib hövzəsində 12, Orta Şərqdə isə 6 döyüş gəmisi var.
ABŞ Mərkəzi Komandanlığının “məsuliyyət zonası” 4 milyon kvadrat mildən artıq ərazini əhatə edir. Bu zona Şimali-Şərqi Afrika, Orta Şərq, Mərkəzi Asiya və Cənubi Asiyada yerləşən Misir, İraq, Əfqanıstan, İran və Pakistan da daxil olmaqla 21 ölkəni əhatə edir.
Həmidə İbrahimova
