Mursi casus imiş?

Misirin sabiq prezidenti Məhəmməd Mursiyə qarşı yeni ittihamlar irəli sürülüb.

Sabiq prezident casusluqda da ittiham olunur. Belə ki, prokuror Mursiyə qarşı Qətərə Misirin milli təhlükəsizliyə dair məxfi məlumatlarını ötürməklə əlaqədar ittihamlar irəli sürüb.

Misirin baş prokuroru açıqlamasında bildirib ki, Mursi və onunla bərabər daha 10 müttəhim Qətərin kəşfiyyat xidmətinə məxfi məlumatlar ötürdüklərinə görə məhkəmə qarşısına çıxarılacaq. İttihamların irəli sürüldüyü şəxslər arasında "Əl-Cəzirə" kanalının bir icraçı rəhbəri də var.

Baş prokurorun bəyanatında deyilir ki, bu Müsəlman Qardaşları təşkilatının ölkəyə qarşı ən böyük xəyanətlə bağlı məhkəmə işidir.

Prokurorlar ötürülmüş gizli sənədlərin Misir ordusu və hərbi qüvvələrdə istifadə edilən silahların detalları ilə bağlı məlumatları əhatə etdiyini bildirib.

Qeyd edək ki, Mursiyə qarşı 3 ittiham üzrə məhkəmə prosesi keçirilib və sabiq prezidentin ölüm hökmü ilə cəzalandırılacağı da istisna deyil. (anspress)

Ölkə.Az