CNN: ABŞ İranla münaqişə başlayandan bəri azı 7 hərbi təyyarəsini itirib
"Ölkə.az" xəbər verir ki, bu barədə "CNN" telekanalı öz mənbələrinə istinadən məlumat yayıb.
Məlumata görə, ötən cümə günü vurulan "F-15" qırıcısı və qəzaya uğrayan "A-10" hücum təyyarəsi ilə yanaşı, daha beş təyyarənin itirildiyi bildirilir:
2 mart: Küveyt üzərində üç "F-15" qırıcısı Küveyt Hava Hücumundan Müdafiə (HHM) qüvvələrinin səhvən açdığı ("friendly fire") atəş nəticəsində vurulub. Altı heyət üzvünün hamısı katapult edib, üç pilot artıq xidmətə qayıdıb.
12 mart: İraqda "KC-135" yanacaqdoldurma təyyarəsi qəzaya uğrayıb, nəticədə 6 ABŞ hərbçisi həlak olub. Pentaqon təyyarənin vurulmadığını, başqa bir təyyarə ilə toqquşduğunu açıqlayıb.
27 mart: Səudiyyə Ərəbistanındakı "Şahzadə Sultan" aviabazasına İranın hücumu nəticəsində ABŞ-ın bir "E-3 Sentry" uzaqmənzilli radiolokasiya aşkaretmə (AWACS) təyyarəsi yerdə məhv edilib. Hadisə zamanı 10 hərbçi yaralanıb.
Ötən ay: Bir "F-35" qırıcısı ABŞ-nin Yaxın Şərqdəki bazalarından birində qəza enişi edib.
Xatırladaq ki, 28 fevral tarixində ABŞ və İsrail İrana qarşı hərbi əməliyyatlara başlayıb. Zərbələr İranın ən böyük şəhərlərinə, o cümlədən Tehrana endirilib. Buna cavab olaraq, İslam İnqilabı Keşikçiləri Korpusu (SEPAH) İsrailə və ABŞ-nin Bəhreyn, İordaniya, İraq, Qətər, Küveyt, BƏƏ və Səudiyyə Ərəbistanındakı hərbi obyektlərinə genişmiqyaslı hücumlar təşkil edib.(teleqraf)
