ABŞ əfsanəvi "A-10"ların xidmət müddətini uzatdı: Onları unikal edən nədir?
Məlumata görə, ABŞ artıq bu təyyarələrin əvəzlənməsi üçün planlar hazırlayır. Əsas alternativlər arasında "F-35 Lightning II”, "F-15EX Eagle II” və pilotsuz uçuş aparatları yer alır. Lakin bir sıra ekspertlər bu əvəzləmənin tam effektiv olmayacağını düşünürlər. Səbəb isə "A-10”un aşağı hündürlükdə və aşağı sürətlə uçaraq zirehli texnikaya qarşı yüksək effektivlik göstərməsidir.
Təyyarənin ən diqqətçəkən xüsusiyyəti onun əsas silah sistemi ətrafında qurulmasıdır. "GAU-8/A Avenger” 30 mm-lik yeddi lüləli top "A-10”u əsl uçan silah platformasına çevirir və ona yüksək intensivlikli atəş gücü qazandırır.
"A-10” həm də davamlılığı ilə seçilir. Aşağı hündürlükdə uçuş səbəbilə düşmən atəşinə daha çox məruz qalan təyyarə xüsusi zirehlə qorunur. Kabinəni əhatə edən "titan vannası” pilotu 23 mm-lik mərmilərə qədər atəşdən qoruma qabiliyyətinə malikdir.
"A-10” təyyarələri Körfəz müharibəsi zamanı öz effektivliyini sübut edib. İki pilotun bir gün ərzində 23 tankı məhv etdiyi halların olduğu bildirilir. Ümumilikdə isə bu tip təyyarələrin 900-dən çox tankı, 2000-ə yaxın digər hərbi texnikanı və 1200 artilleriya sistemini məhv etdiyi qeyd olunur.
Hazırda planlara əsasən, "A-10 Thunderbolt II” ən azı 5 il daha xidmət göstərəcək.(qaynarinfo)
